Chalut mes gins ! Vingt dius ! T’es in train de t’dir’te : cha y est, Marie Toutoule alle va parler politique. D’jà qu’i n’y a qu’cha ailleurs ! Nin, Ch’est pon cor’ l’momint pou lincher l’Mouvemint Chtitoyens^©, mes gins. Mais te dos t’douter, vu ch’tite, in va quind même tourner autour de ch’sujet. Sins prisse d’tiête, j’t’rassur’te. Ichi, ch’est chint pou chint bionne humeur, te l’sais ! Ch’est com’ l’Port-Chalut, ch’est marqué d’sus quind t’arriv’tes such’ chite ! J’sus simplemint quée su eune nouvielle qui m’a amusée…

Alle vient d’Italie. Te sais, ch’est l’pays d’ù qu’in minge des pâtes tous ches jours volontair’mint. Alors qu’ichi, ch’est parch’que te n’as pus l’chox quind te vos ch’qu’i ress’ pou finir t’mos ! Cheule information alle traite du Présidint italien, Silvio Berlusconi, qui est in train d’préparer sin nouviel album. Ouais, t’as bien lu, mes gins. I in avot d’jà sorti un aute qui avot même été plaché au Top Chinquinte d’là-bas ! Cha, ch’est l’ginre d’truc qui m’plait, mes gins. Forcémint, m’boîte à neurones alle tricote auchitôt un scénario. Mi, j’vos toud’chuite qu’in pourrot faire l’Europe d’eune aute manière. Ichi, y a d’jà Carla, l’Première Dame. Même chi not’ Nicolas 1^er i n’cante pon, li, ch’est l’source d’inspiration pou s’femme. I cour’te toudis. I a toudis qué cosse à raconter. Bref, l’profil type du gars qui vindrot l’lune pou in faire un porte-clés. In li confierot l’rôle d’manager, indispinsape à tous ches artistes. I pourrot bin vinte à ches pays du Monte eune chorale européenne qu’in pourrot appeler L’Voix de l’Europe !
Te t’rinds compte d’jà du progrès qu’in f’rot d’un cop. L’Europe qui cant’rot d’eune voix unique ! Eune révolution… J’dis canter mais in peut auchi parler su d’el musique. In a un chpécialiste d’cha, l’garchon d’Nicolas 1^er. A’ch’t’heure, i n’y a plus qu’à treuver l’ress’ d’el troupe car eune chorale, ch’est nin un duo. Com’ dins toutes ches chorales, in cante un peu d’tout, in pourrot faire d’chaque arprésintant d’ches pays eune chpécialité…
In va commincher par Silvio. Che s’ra li pou toutes ches canchons d’amour dins l’grinde tradition des canteurs italiens. Mais, mi, j’el vos pus dins l’rôle d’chuque. Pardon, mes gins, j’te l’fais in italien : Zucchero ! I a d’jà l’bionne corpulinche et j’l’imagine bin qui no cante : « Diavolo In Me. » L’diape in mi, in ch’ti dins l’texte. Bin, ch’est un caud, l’Silvio. Dins eune canchon à li, i dit « à force d’baisers te faire sintir bielle ». Te armarqu’ras quind même qu’i vaut miux l’vir écrite, cheule phrasse. Pach’que le « S » muet, cha peut prêter à confusion !
Pou Angela, alle pourrot arprinte eune canchon d’Bill, ch’ti qui ch’est coiffé aveuc un pétard dins l’groupe Tokyo Hotel. « Übers Ende der Welt » qui, com’ tertous i sait, cha veut dir’te : Sur l’fin de ch’Monte. Quind in vot tous cheuls qui s’font l’guéguerre ; cha no pind à nez ! Ch’est toudis parel aveuc ches Allemands quind is cantent. In crot toudis qu’ch’est eune marche militaire. Alors qu’is ont auchi des canchons très gaies. Te prinds l’fiête d’el bière, par exempe.
Pou l’Espagne, Juan Carlos i pourrot arprinte des canchons d’Julio pou ches solos. Bion, cha no fait cor’ un aute canteur d’amour. Mais in pourrot li faire canter « J’n’ai pon chingé. » Après tout, ch’est li l’Ro d’pis 1975 ! Gramint d’timps pou prouver in quo… A’ch’t’heure, quind i aura gramint d’intraîn’mint, i pourrot arprinte ch’tite de l’eurovision 2008 : « El chiki chiki ! »
Pou ches Inglais, j’préfère qu’in prenn’te William et Harry. I fot auchi pinser au jeune public ! In pus, is sont bellots… L’solo in duo, bin is sont deusse. Eune canchon d’Pétula Clark « Downtown » à deusse vox et verchion gospel. Mi, j’leu f’rot auchi canter un méga-tube françés : «  Did you come for holidays ?» T’arconnos ch’tite. Ouais, ch’est : « Ech-que te viens pou ches vacinches ? » J’vos d’ichi toutes ches files hystériques qui in ard’minde cor’ !

In n’va pon faire ch’tour d’tous ches pays. Cha s’ra à ti, dins ches commintaires, d’treuver eune chuite à cheule liste d’canteux. J’attinds tes propositions…
In va quind même in vir un aute avant l’France. Ches Belges. Bin j’n’ai pon l’invie d’printe l’Ro nin pus. J’n’armets pon in cosse sin brin d’vox. I m’simpe qu’i y in a un aute qui s’est d’jà essayé au chant à l’tévé. Ch’est Yves Leterme, ex-futur premier ministre. Bion, i fot nin li confier eune canchon trop dur’te. Te t’souviens, ch’est li qui a canté l’Marseillaise quind un journaliste i li a d’mindé l’hymne Belge. Confondre l’Marseillaise est l’Brabançonne, ch’est l’preuve qui a un problème « d’mémoire ». Alors, j’ai pinsé à « Tata Yoyo » d’Annie Cordy. Ch’est gai, fachile à art’nir. In peut li faire faire auchi « Cho Ka Ka O », in hommache aux chocolats belges. « Frida Oum Papa » qu’i pourrot faire in duo aveuc Angela. Et i finirot sin tour solo par « l’Hurluberlu » in hommache à li-même !

Cha y est, ch’est l’momint. Ch’est l’instint. L’grind solo d’Carla. Quo qu’in va li faire canter ? « Quate consonnes et tros voïelles, ch’est l’prénom d’min Nicolas. » Ch’est bin mais pon assez arprésintatif d’el canchon françésse. In souv’nir d’ches vacinches à Cap Nègre, alle pourrot canter « La Mer » d’Charles Trenet. In pus, is la connaiss’tent partout dins ch’Monte. « L’Vie In Rosse » ch’est bin auchi même chi, à’ch’t’heure, in France, cha s’rot plutôt l’vie in gris. « Min Légionnaire » in hommache à Nicolas 1^er, chef des armées. Nin, mi j’vos auchi un truc pus léger, pus dins l’air du timps d’eune rintrée syndicale, par exempe. D’ù qu’in va cor’ vir gramint d’gins dins ches rues défiler pou réclamer des sous, l’artraite à quarinte ins et tout l’ress’. Alors in va tous canter insimpe, aveuc Carla, l’hymne par excellinche d’eune grinde manif d’ù qu’in est «  A la queue leu leu ! »… Tout l’monte défile à la queue leu leu. Tout l’monte réclame à la queue leu leu. In arvindique à la queue leu leu. Pou not’ stinding à la queue leu leu…
Te peux continuer, mes gins, t’es dins l’rythme !