D’artour ou pon ?

Lundi 25 août 2008 1 25 /08 /2008 14:32

Chalut mes gins ! A’ch’t’heure, in sait qu’ch’est l’dernière line drote d’ches grindes vacinches ! D’ailleurs, y in a gramint qui arprenn’tent ch’lundi. In pus, ch’est toudis parel, quind t’arprinds ch’traval, l’timps i d’vient pus bieau. Histoire qu’in t’fasse argretter cor’ pus. J’t’el dis, mes gins, l’vie alle est mal faite ! In donn’te raison à Patrick Juvet quind i a écrit pou Claude François : « Ch’lundi à solel, ch’est eune cosse qu’in n’aura jamais ! »

J’en intinds d’ichi qui dis’tent : Ches meilleux cosses is ont eune fin ! » Et pouquo cha ? Pouquo ches meilleux cosses alle ont b’soin d’avoir toudis eune fin ? Pach’qu’in pourrot s’habituer à un peu d’bionheur, d’joe d’vifre. Bin, ch’est quo l’problème lad’dins ?

Nin, ch’est vrai, mes gins. Ch’est drôl’t’mint miux quind t’es d’artour, d’treuver ches factures, ches impôts. Ches prix qui augmintent pindint qu’te t’dor’tes l’pilule à solel dins l’echpoir que t’boîte à neurones alle n’se souviendrot pus d’combien t’avos payé avint d’partir. D’jà qu’is augmintent quind t’es lal, alors ! Mi, j’ai l’imprechion que ches meilleux cosses alle dur’tent l’timps compter juss’qu’à tros et qu’ches immerdes alle dur’tent gramint pus long…

Allez, chi t’es à traval, j’n’vais pon t’dissiper pus long ! I fot qu’te rattrapes tout ch’que tes collègues is t’ont laiché in plan pach’qu’is avotent peur que tu t’innuies à t’artour ! Et pour infoncer ch’clou cor’ pus, mais te sais que j’te taquine toudis, mes gins, v’là Voltaire qui ch’y met pou t’donner l’invie d’raviser ch’solel à travers ches feniêtres d’tin bureau…