Chalut mes gins ! A’ch’t’heure, j’veux juss’ fiêter un évén’mint aveuc ti. Ch’est sûr, cha n’va pon révolutionner t’vie mais ch’est quind même un cap. J’te vos d’ichi, t’es in train de t’d’minder quo qui s’pache d’important. Ch’est nin sin anniversaire ; ch’étot l’disse-chept juin. Ch’est nin s’fîête ; in n’est pon l’Sainte Marie ni l’Sainte Toutoule. Ch’est nin un jour particulier. Chi, in a l’drot à un tiot peu d’solel mais ch’est nin l’première fos ! Mais quo qu’ch’est qu’i s’pache ?…

J’n’vais pon t’faire linguir pus long. J’voulos simplemint marquer ch’jour d’eune pierre blanche et invoyer un grind, très grind merchi à tertoutes et tertous, qui m’lis’tent régulièr’mint. Aussi, bin sûr, à tous ches nouvieaux lecteurs qui vienn’tent d’querre ichi par ch’t’hasard d’quéques clics d’leu mulot. A’ch’t’heure, mes gins, ch’est l’chintième artique ! Ouais, t’as bin lu : 100 !!! Deusse fos 50/50, t’as pus qu’à app’ler un ami pou li in parler !

J’n’vais pon chiter tous ches fidèles, j’auros bin trop peur d’in oublier au passache. D’toute fachon, is vont s’arconnaître. J’em rinds compte que j’prinds mes rêfes pou eune réalité. J’avos oublié d’mette lecteurs après fidèles. Fidèles, cha fait un peu checte. Mi, l’Grinde Prêtresse et ti, mes gins, mes fidèles dischiples. Après tout, in pourrot prôner l’rire com’ dischipline d’vie. J’pinse qu’in in a tertous grind b’soin. Chinq minutes d’rire obligatoire tous ches jours !  Nin, eune checte, ch’est trop chélectif. Mi, j’accepte même cheuls qui font l’guiffe ou qui rir’tent quind is s’brûl’tent. J’n’sus pon chectaire…

Un grind mouv’mint, cha, ch’est eune idée ! In pourrot l’app’ler : Le Mouvemint Chtitoyen^©  . Trop tard pou m’piquer l’idée, chi t’es un pirate, j’viens copyrighter ch’nom. J’arprinds min echplication mais i fot toudis s’protéger aveuc ches pirates et ches plagiaires. Ouais, cha sonn’te bin, te n’treuves pon ? Quo qu’in f’rot ? D’el politique ? In tout cas, j’sus sûre qu’in f’rot auchi bin, voire miux qu’chertains… Mais in l’f’rot toudis aveuc eune pointe d’humour. Cha fachilite gramint les cosses quind te mets un tiot cop d’humour. Te d’viens pus récheptif…

Pou l’momint, Marie Toutoule alle ress’ alle-même. Ch’est d’jà pon chi mau. Mais l’idée alle est quind même linchée. J’sus prête à étudier toutes ches propositions qu’in pourrot m’faire pou essayer, à m’nivieau, d’faire avincher ches cosses dins l’bion sins, et aveuc du bion sins. In va in rajouter un aute : et aveuc un bion d’essence. Ch’est important par ches timps qui cour’tent…

J’armerchie tous ches gins qui m’témoig’tent d’el chympathie et des incourach’mints par des maiyes que j’d’viens rouche à mes jues. Min avinture su tin écran d’manicraque informatique m’permet d’rincontrer, régulièr’mint, des gins formidapes. Des connus, des connus seul’mint dins leu quartier et cheuls qui l’deviendront un jour. J’armerchie auchi ches vedettes, mes gins, qui vienn’tent faire un tour su min chite mais qui n’os’tent pon m’l’dire ! Messache particulier à cheuls-lal, j’ai b’soin d’ti auchi !!!

V’là, mes gins, in va finir par tout min intourache familial, qui supporte mes toutouleries. Mes amis, eune poignée d’fidèles d’intre les fidèles, même l’p’tit dernier. Hein, min Nicolas ! Nin, ch’est quind même pon l’mari d’Carla… Min facteur, même ch’i continue à m’apporter ches factures. Tous cheuls qui n’m’aim’tent pon et dis’tent du mau d’mi. Com’ i disot Erik Satie : «  A cheuls qui déblatèrent derrière min dos, min cul i les contemple ! » Et même ches gins têtus, bornés, pon très profechionnels et carrémint cons. Is peuv’tent continuer, cha m’donne des idées pou mes artiques…
Cor’ un dernier truc, après te pourras vaquer à tes occupations. Pou cheuls qui n’l’ont toudis pon fait, te t’inscris à « Ches Niouzes » ! Même chi t’es connu, in n’vos pon tin adresse. Cha n’te coûte rin. Te n’s’ras pon innondé d’spams par mi. Y in a d’jà qui s’in charge. Merchi cor’ tertoutes et tertous !