L’grind déballache !

Vendredi 22 août 2008 5 22 /08 /Août /2008 17:31

L’grind déballache !

Chalut mes gins ! Nin, ch’est pon d’el Braderie d’Lille qu’in va parler à’ch’t’heure. In verra cha insimpe in timps voulu. Chi j’ai choisi ch’tite, ch’est pach’que ch’est l’actualité du jour et pou ches tros ouiquen’z à v’nir.

In est toudis in train de s’plainte que not’ pouvoère d’achat i baisse. Pou eune fos, in n’s’plaint pon pou rin : ch’est vrai ! Parallèl’mint, in n’arrête pon de t’dir’te à la tévé, dins ches médias, qu’i fot minger au moins chinq fruits et légumes par jour. Ch’est bin, chi t’es eune vedette ou un pipol et qu’l’argint i rinte pus vit’ qu’i n’arsort ! Car, mes gins, quind te ravises ch’prix d’un kilo d’fruits ou d’légumes, in n’peut nin dir’te que cha aide gramint tin pouvoère d’achat. Y a même des momints d’ù qu’te t’demindes chi ch’est nin l’référince du produit ! A côté d’cha, mes gins, in t’dit auchi qu’i fot minger et bouger. Ch’est même dev’nu drôl’te, chi te ravises eune coupure d’pub, au lieu d’aller faire pipi. T’as quasimint tros spots su quate d’ù qu’in t’incruste ch’messache. Chi cha continue, in va finir par te l’mette in autocollant su l’nouvielle tévé qu’te va acater. Bouger, te peux, ch’est gratuit ! Minger, ch’est eune aute histoire… Ch’problème, ch’est qu’pus qu’te bouges, pus qu’t’as faim ! In va faire eune parinthésse su l’aute slogan qui dit : Pou t’sinté, évite ches alimints sucrés, salés, gras ! Cha, j’auros pu dir’te l’même cosse et même aller pus loin dins l’raisonn’mint : T’as qu’à chucher des glachons !

Ches gins de l’INSEE is dis’tent auchi qu’el génération Internet, ch’est à dire autour d’vingt ins, alle ming’te moins d’fruits et légumes que leux parints, qui in ming’tent cor’ moins que ches grinds-parints. J’m’étonne même qu’in n’a pon dit qu’ch’est à cosse d’Internet. Pisque dès qu’i y a un truc qui n’va nin, ch’est, li, l’responsape. Infin, ch’est eune aute histoire, in in arparl’ra. Mi, j’peux dir’te sins ête expert, que ch’est inversemint proportionnel à ch’prix ! Bin, ch’est com’ cha, mes gins. Des souv’nirs d’math m’arvienn’tent et auchi gramint d’bion sens...
Tout ch’déballache d’mots — te armarqu’ras l’transition d’profechionnel — ch’est pou t’parler d’el vinte au déballache. Alle vient d’ête autorisée pou écouler ches stocks in fruits et légumes d’saison à prix coûtant ! Alors, t’as pus qu’à faire eune orgie d’fruits et légumes, ches producteurs is t’armercieront. Te verras qu’cha fait tout drôl’te d’payer sin kilo d’tomates moins d’un euro mais in ch’y fait vit’ ! Pou parer à ch’manque à gagner, ches grindes surfaches alle vont organiser eune grinde quinzaine d’promotion such’ PQ. Bin ch’est normal, mes gins. Quind te n’as pus l’habitute d’minger ches fruits et légumes in quintité, t’as, com’ qui dirot, un tiot problème d’évacuation…