I fait bieau là-haut ?

Jeudi 21 août 2008 4 21 /08 /Août /2008 17:30

I fait bieau là-haut ?

Chalut mes gins ! Com’ j’ai querre à l’faire régulièr’mint, j’vais parler d’un truc que j’ai lu dins l’journal. In dit toudis qu’ches asiatiques is sont tiots. Ch’est vrai, j’arviens d’Pékin et j’em sus jamais sintie auchi grinde ! Mais com’ toudis, y a eune exception à l’règle…

Cheule année, l’bouquin qui recinse tous ches arcords, el Guinness 2009, i va mette à l’honneur l’plus grind homme d’el Tierre. Te l’auras d’viné sins mau vu min paragraphe d’introduction, ch’est un chinois qui à rimporter l’gros lot. Monsieur Bao Xi Shum mesur’te 2,36 m ! Ouais, t’as bin lu, mes gins : deusse mètes trinte-chisse. Pou l’tiote histoire, Bao, sin prénom, cha veut dir’te léopard. Eune bielle biête, quo !

Cha dot ête bin d’avoir dins tes amis un garchon parel. Quind t’as eune ampoule à chinger, pon b’soin d’équelle. I t’fait ches minous à plafond com’ in fait ch’ménache à hauteur d’homme. T’économisses eune nénette. Infin, chi i in a qui n’fon’te jamais ch’ménache, j’devros écrir’te eune tiête d’loup parch’qu’is von’tent croir’te qu’i s’agit d’eune femme d’ménache, eune nénette ! Par contre, ch’brafe Bao i dot s’printe ches chimbranles d’porte sins arrêt. Pon question pou ti d’mette eune bielle assiette souv’nir juss’ lal chi te n’veux pon qu’i t’arjue « vaisselle cassée d’Pierre Perret » in permaninche ! Nin, aveuc li, i faudrot pus mette un pannieau du ginre : « Ch’port du casque i est obligatoire ! »

A’ch’t’heure, mes gins, te vas m’dir’te : « Est’ch qu’in peut treuver un casque assez grind pou s’tiête car cha dot faire un sacré diamète ? » Cha, Marie Toutoule alle ne saurot pon t’réponte. In pourrot toudis bricoler un truc aveuc eune tiote bassine in plachtique dont in mettrot d’el ouate ou des fouffes à l’intérieur pou faire du rimbourrache et eune ficelle pou qu’cha li tienn’te su l’tiête. I n’aurot pon fière allure, ch’est sûr, mais in évit’rot ch’traumatisme crânien à chaque ching’mint d’pièche !

J’in vos d’ichi qui s’dis’tent : « Est’ch que tout i est pus grind, com’ l’diamète de ch’tiête ? » Cha, l’histoire ne l’dit pon. I t’ress’ pus qu’à t’imaginer l’cosse…