A m’baraque mais décalée…

Mercredi 20 août 2008 3 20 /08 /Août /2008 13:41

A m’baraque mais décalée…

Chalut mes gins ! Vingt dius, in a du mau à s’armette dins l’bain ! Min corps i est ichi, dins ch’Nord, mais m’tiête alle est cor’ à Pékin. Infin, quind j’dis m’tiête, j’pinse churtout qu’ch’est min horloche biologique qui est toute déréglée ! Te pinses, ti, m’tiête alle vit cor’ aveuc l’heure d’là-bas.

Quind j’sus arrifé à m’baraque, hier, i étot inviron vingt heures. Lal, Yvette alle m’attendot aveuc min Pépette d’amour. Alle avot fait à minger et m’avot servi l’apéro. Te parl’tes, ti, l’apéro et l’dîner à deusse heures du mat ! Infin, je n’allos pon râler mais, à’ch’t’heure, j’ai du mau. Min echtomac i n’sait nin ch’qu’i dot faire aveuc tout quo qu’i a ind’dins. J’n’te parl’te pon d’em nuit ! Min erreur ch’est d’avoir piqué du nez dins ch’t’avion. Alors t’essayeras, ti, d’dormir quind te viens d’faire l’sieste et minger. Quind te vas t’couquer à vingt-tros heures ichi alors que t’tiête alle pinse qu’i est chinq heures et pourtint qu’te n’as pon sommel ! In n’va nin s’plaindre. Y a pus malheureux…

Com’ j’avos qu’cha à faire cheule nuit, j’ai survolé tout quo qui ch’étot passé pindint min absince. Com’ d’habitute, in a pus l’drot à des mauvaisses nouvielles qu’à des bionnes. J’pinse in particulier à ches soldats françés. Bin, ch’est toudis parel. Quo qu’in va faire dins ches pays-lal alors qu’in a tint d’cosses à faire ichi, dins not’ pays ! In n’aurot pon pu invoyer ches militaires à Haumont et ches autes villes autour pou aider ches gins. Au pire, ches militaires, is aurotent été incommodés par ches sintimints d’Maroilles qui n’est nin loin, chi is n’avotent pon l’habitute !

Y a quind même un truc que j’artreuve in rintrant. J’sus partie aveuc l’pouvoère d’achat in berne et j’arviens aveuc ! Seu bionne nouvielle, te peux mette quéques gouttes d’essinche in pus dins tin réservoir pou l’même prix ! T’as intérêt à faire attintion aveuc l’truc d’el pompe pou nin les faire querre à tierre, ches quéques gouttes ! In pourrot t’printe pou un milliardaire. A’ch’t’heure, t’as vit’ arperdu l’bénéfiche d’cha quind te dos acater ches fournitures scolaires pou tes gamins !

Infin, in n’va pon Paul et Mickey lad’chus. Pardon, mes gins, j’ai fait eune erreur d’trinscription intre min echprit et mes dogts such’ plaque à touches. J’voulos écrir’te polémiquer. Quind j’te disos qu’el décalache horaire i n’juot pon in m’faveur ! J’vais m’arposer un tiot peu, juss’ après l’phrasse qu’in va vir insimpe. Bin, cha f’sot long qu’in n’avot pon réfléchi in françés. Forcémint, te dos bin t’douter que cha a un rapport aveuc ches heures…