L’persévérinche récompinchée !

Lundi 18 août 2008 1 18 /08 /Août /2008 15:56

L’persévérinche récompinchée !

Nǐ hǎo mes gins ! Ch’est l’dernière fos que j’t’el fais in chinois. D’main, j’arprinds l’avion pou rintrer à m’baraque dins ch’Nord ! In va artreuver ches tiotes habitutes. D’timps in timps, in ravisera insimpe eune tiote phrasse d’Confucius ou d’Lao-Tseu. Cha permettra de s’armémorer ch’voyache in Chine et cheule culture vraimint très différinte d’el not’.

Marie Toutoule alle est fière d’avoir partichipé à ch’grind éven’mint sportif. Alle est fière auchi d’avoir décroché eune médale pou l’France. Nin, ch’est nin cheule in chocolat, ch’est eune vraie, in OR ! Cha y est, mes gins ! T’es au courant, à’ch’t’heure, que j’ai fait armonter cheule score. Cha n’a pon été simpe, in toute modestie, mais j’n’ai nin baiché ches bras ! J’vais, quind même, continuer min intraîn’mint pou l’plaiji. P’t’ête que j’f’rai ches autes JO dins quate ins. J’n’in sais rin cor’ car eune carrière d’sportive d’haut nivieau com’ l’mienne, cha n’dur’te pon long.

A’ch’t’heure, te trépines dins tin coin, alors in va l’ver l’voile su min exploit. Te buques su not’ drapieau françés qui flotte à ch’vint d’Asie et te vas découfrir l’photo souv’nir d’min montée su l’pus haute marche du podium et quelques photos souv’nir de mes séinces d’intraîn’mint. Merchi pou tin soutien, mes gins !