Nǐ hǎo mes gins ! J’sus toudis ichi, à Pékin, in attinte d’min passache. Heureuss’mint qu’i y a gramint d’trucs à raviser pach’que j’comminche à tourner in rond dins m’champe d’hôtel. Te sais, l’quatorsse qui est in fait dousse ! J’sus gonflée à bloc et min intraîn’mint i est à top ! Pis, m’baraque alle m’minque ; min tiote Pépette auchi. Heureuss’mint qu’m’copine Yvette alle s’in occupe bin.

L’moral d’ches françés i armonte auchi, mes gins. D’pis qu’Alain Bernard i a eune médalle en Or et pis d’autes auchi. J’ai rincontré Alain, dins ches rues d’Pékin. In no a tiré ch’portrait, insimpe, mais j’ai mis, mi-même, eune cinsure su cheule photo. Ch’est impossipe d’me montrer com’ cha, mes gins. In dirot que j’sus eune allumette à côté d’un potieau ! Qué gaillard !

Te n’y coup’ras pon à’ch’t’heure, i fot que j’pinse à min artour in France, dins not’ bieau Nord et j’ai accepté d’faire eune pub d’pus pou min sponsor PASQUEJEULVOBIN. Cha mettra du Mei Kuei Lu dins ch’gossier ! Bin j’pouvos nin dir’te du burre dins ches épinards, i n’y in a pon ichi ! Ti, j’te vos aveuc tes grinds zis. Marie Toutoule alle a cor’ invinté quo ? Rin, mes gins ! L’Mei Kuei Lu ch’est ch’alcool d’riz et d’sorgho aveuc l’goût d’rosses. Ch’est ch’qu’in sert dins ches restaurants chinois, in France, aveuc ches verres qui sifflent pou ches files et ches verres aveuc eune femme nue pou ches hommes. Rin à vir aveuc l’Saké qui est japonais, li !

Hòu huì yǒu qī, mes gins !