L'cacheusse d'Or...

Mercredi 13 août 2008 3 13 /08 /Août /2008 13:07

L'cacheusse d'Or...

Nǐ hǎo mes gins ! Dins min invie d’t’faire découfrir cor’ des canteurs d’ichi, j’ai mis in fond musical un groupe d’garchons, un boysband, chi te préfères. Ch’est Yí Rén Zhìzào (Yi Creation) qui cantent « māma » (maman). L’musique alle va t’faire planer. Pon trop long car in est vit’ armis dins l’imbiance : Ichi, l’moral d’ches Françés i est à pus bas, com’ ch’plafond d’pollution. In n’peut nin dir’te qu’in excelle in performinches. Ch’devisse d’ches JO ch’est « One world, one dream », un monte, un rêfe. In va plutôt arbaptisser cha : Un monte, un cauch’mar ! Ch’est l’grind plouf, churtout pou ches nageurs ! Laure alle coule… (In peut écrir’te auchi l’or alle coule.) Cha, alle a trop perdu d’force in nageant d’Paris à Pékin pou cheuls qui no vintent l’électricité. Ch’est toudis parel aveuc ches champions. Is sont attirés par ches publichistes et is oubli’tent leu intraîn’mint. Te m’diras, quind in t’met un gros chèque sous ches zis, cha t’relativisse tin manque d’performinches. Tin futur i est assuré ! Infin, mes gins, j’n’sus pon sûr qu’ches gins d’EDF is li dis’tent « xiè xiè » (merchi) à Laure, com’ alle dit in sortint l’ieau dins ch’pub !

In attindint, mi, j’continue à exercher min intraîn’mint intre deux visites d’el ville. L’grind jour i est bintôt lal ! In n’sait pon, j’rêfe tout d’bout mais j’s’ro p’t’ête l’unique et l’seu françésse à grimper su l’pus haute marche du podium ! Cha s’rot bin, mes gins. J’s’rais auchi vedette partout et pon seul’mint dins min quartier !

Tiens, te dos te d’minder pouquo in parl’te d’Pékin alors qu’in vot écrit Běijīng. Ben, Marie Toutoule, qui est toudis eune bionne copine pou ti, alle a posé ch’question. Cha vient d’ches missionnaires jésuites françés au XVIIème chiècle qui ont traduit pou l’première fos Pékin in oubliant l’ching’mint d’prononciation qui a eu pindint l’dynastie Qing. Allez mes gins, com’ t’as été un bion élèfe et qu’t’as bin art’nu cheule lechon d’histoire, t’as l’drot à deusse imaches…