L’tour infernale…

Lundi 11 août 2008 1 11 /08 /Août /2008 20:49

L’tour infernale…

Nǐ hǎo mes gins ! Cor’ un peu d’attinte et te sauras chi j’vais gagner ch’t’épreufe pou avoir l’médalle d’or. In in a bin b’soin pach’que l’France alle n’in a pon gramint pou l’momint ! In attindant, j’vais t’parler d’eune mésavinture qui m’est arrifée. Dins mon invie d’vir des curiosités, j’sus allée fur’ter un peu pus dins Pékin. In arv’nint à min hôtel, i n’y avot pon l’tiot gars dins l’ascenseur. Te sais, ch’ti qui appuie such’ bouton d’ù que’te veux aller. Bion, ch’est nin grafe, que’j’me sus dit, in va faire l’grinde file.

Bin, mes gins, j’m’su artreuvée d’vint un pannieau d’ù qu’i y avot plein d’boutons. Heureuss’mint, is avotent mis ches étaches in chiffres com’ nou’z’autes auchi. J’avos juss été boire un thé et ch’étot tint miux, car chi j’avos été pou eune tiote fumette dins à cabaret à opium, j’auros bin cru que j’halluchinos ! Te t’dis qu’i y a un truc qui n’coll’te pon, mais te n’sais pon toud’chuite d’quo i in artourne. Alors tes zis is scrutent cor’ et cor’ et, lal, te comprinds qu’ch’est nin eune illusion d’optique. Te n’as pon l’berlue ! T’as ch’bouton un, deusse, tros, puis chinq, chisse, chept, huit, neuf, disse, onsse, dousse, quinsse, etc. Et quind t’arrifes dins ches vingt, t’as vingt et un, vingt-deusse, vingt-tros, vingt-chinq ! Min hôtel i n’allot pon pus haut. Treisse, te comprinds toud’chuite pouquo i n’y in a pon.

Quind t’as réservé pou ch’voyache, que ch’t’agince alle te dit qu’t’as eune champe au quatorssième aveuc eune bielle salle d’bain. Te n’in cros pon tes zis. In a volé ch’quatorssième étache ! Quo que j’vais faire ichi sins mes tiotes affaires. Min maquillache, min shampoing PASQUEJEULVOBIN et tout l’ress’ ! In pus, dins m’champe, y a min t’nue pou faire ch’t’épreufe ! Adiux médalle in or, Marie Toutoule alle arvint bredoulle… Fini min rêfe d’victoire olympique, in a volé ch’quatorssième et tous mes rêfes…

Allez mes gins, j’te rassur’te. Min ingoisse alle n’a pon duré long. Ch’tiot gars i étot arv’nu aveuc un aute client, un françés. J’li essplique min cas et li, i s’met à rir’te com’ un babache. Cha ch’est sûr, quind i m’a dit quo, j’m’ sus sintie biête. In fait, ches chinois is sont très superstitieux. L’quate, pou eux, ch’est l’chiffre d’el mort. Alors dins l’plupart d’ches immeupes, is inlèf’tent tous ches nombres qui contienn’tent l’quate. L’treisse, is s’en foutent. Ch’est pou faire plaiji aux occidintaux. Alors, in fait, quind j’appuie such’ quisse, j’arrife à quatorsse. Mais chi j’raisonne en matheux, quind j’appuie such’ quinsse, j’arrive à dousse ! Ch’est compliqué ches chubtilités chinoises, te n’treuves pon ?