M'premier rével in Chine...

Samedi 9 août 2008 6 09 /08 /Août /2008 17:58

M'premier rével in Chine...

Chalut mes gins ! Vingt Dious... J’avos d’jà oublié qu’in dit nǐ hǎo ichi ! J’m’sus misse d’bout aveuc eune musique locale. Com’ j’ai querre à t’faire partager quo qui m’arrife, j’ai mis ch’canchon in fond. Cha s’appell’te « ài qǐng zhuǎn yǐ » et ch’est canté par un bieau gosse d’ichi : Chén Yǐ Xùn. Infin, in verchion com’ nou’z’autes, in dit « Transfert d’amour » par Christopher Chak. J’étos ress’tée sous sin charme très scintillant quind j’ai mis m’tiête à l’feniêtre d’el champe. J’comprinds miux pouquo y a eune canchon qui dit nuit d’Chine, nuit câline. Ti, t’es com’ mi. Te pinses toud’chuite à l’douceur, d’el ouate ! Bin t’as raison, d’el ouate ch’est in permaninche ichi. In vot pon quo qu’i y a à chinquinte mètes à l’ronte ! Ch’est pon eune bionne ville pou ches voyeux qui n’peuv’tent nin raviser pus long qu’leu nez !

In va continuer à découvrir ches chpécialités. Com’ j’n’peux nin t’proposer d’goûter l’cuisine chinoisse par Internet, j’vais t’proposer l’nourriture d’l’echprit. A’ch’t’heure, in va parler d’deusse « pinseux » incontournapes ichi : Confucius et Lao-Tseu. J’ai comminché à lir’te quo qu’is avotent dit un peu pus in détails. In les chite toudis in eximpe. Bin, mi, j’treuve qu’is ont auchi souvint dit des évidinches. Ch’est vrai que l’humanité a fait du qu’min d’pis inviron 1500 ins, mais y a quind même des cosses troublintes. Com’ quo in fait toudis ches même erreurs ! Infin, j’ai sélectionné eune tiotte phrasse d’l’un et eune tiote d’l’aute qui vont nin t’donner des maux d’tiête. Com’ cha, te res’ras in forme pou l’ouiquen’.

Cha n’a rin à voir aveuc min péripe mais y a auchi l’réalité des cosses, dins l’vraie vie. Léa, eune fidèle lectrice alle m’a donné les coordonnées d’deusse assochiations qui s’occup’tent d’ches gins d’Haumont. J’li ai dit qu’j’allos mette ches adresses. Alors j’te les donn’te :

Association des Maires du Nord « Solidarité Sambre » - BP 1179 - 59013 Lille Cedex

Solidarité Avesnois - BP 200 - 59002 Lille Cedex

Hòu huì yǒu qī, mes gins ! (cha veut dir’te à bentôt)