Ouverture des JO Toutoulesques…

Vendredi 8 août 2008 5 08 /08 /Août /2008 13:37

Ouverture des JO Toutoulesques…

Nǐ hǎo mes gins ! Infin ch’est chalut in chinois, chi te préfères. Com’ j’te l’ai dit l’dernière fos, j’m’sus intraînée dur’te pou eune nouvielle épreuve des JO. Marie Toutoule alle n’a pon sacrifié des heures d’long pou n’pon ram’ner eune grosse médalle in or ! J’sais, j’te vos qui trépine d’impachience pou savoir quo que j’ai pu bin faire. Cor’ un ou deusse jours et te sauras. I y a d’autes épreuves avint l’mienne !
In attindant min tour, com’ j’n’ai pon été invitée à cheule ouverture offichielle aveuc min Nicolas, j’sus allé faire queuette dins l’ville et j’sus arrifée à cheule chité interdite. Bin j’n’sais pon chi ch’est pou cha qu’i n’avot vraimint pon gramint d’monte ! Ch’est sûr, mes gins, quind in t’dit qu’ch’est eune chité interdite, te n’as pon vraimint l’invie d’aller raviser indins, mais j’ai voulu garder un souv’nir et in m’a prisse in photo. J’ai voulu ête couleurs locales. J’ai acaté cheule tenue et in m’l’a personnalisée. In a brodé pou mi des idéogrammes. Ch’ti qui est su min épaule, cha veut dir’te amour, tu prononches : a i. Ch’ti du bas, ch’est min prénom, Marie qu’in dit ichi : mǎ lí.
J’ai même pinsé à teinte mes queveux in noir’te. T’inquiètes pon pou mi, mes gins, cha part aveuc un bion shimpoing. Te sais, ch’ti qui est fabriqué par PASQUEJEULVOBIN. Chi te t’souviens, j’ai d’jà fait tros pubs pou cheule marque. Chi te veux t’rafraîchir l’mémoire, v’là ches liens à buquer : première ; deussième ; trossième. J’sus bin obligée d’el chiter. Ch’est cha l’sport à’ch’t’heure ! I fot toudis qu’in treuve quéqu’un pou s’sponsoriser. Mais j’ai dit que j’n’voulos pon qu’in m’imprime l’marque partout ! Pon question qu’in m’trinsforme in pannieau publichitaire…