Déshydratation…

Vendredi 25 juillet 2008 5 25 /07 /2008 11:57

Chalut mes gins ! Cha y est, in a l’drot à un peu d’solel. Com’ i dirot l’aute : « In a failli attinte ! » Ch’est pon tout cha mais quind i fait caud com’ à’ch’t’heure, cha donn’te soif ! Alors in va vir insimpe quéques expréchions in ch’ti qui ont rapport aveuc ch’phénomène déshydratique…

Pou d’minder eune nouvielle tournée, in dit : Armets no ches verr’ com’ is étotent ! Ou : Armets no ches verr’ in peinture ! Et cor’ : In vot bin quind j’ai bu mais nin quind j’ai soif !

Quind l’liquide qu’in t’sert i est nin bion : Ch’est d’el pichate d’baudet !

Quind l’café qu’in t’sert i est nin bion : Ch’est du jus d’cauchettes !

Quind t’as trop bu, te peux dir’te, et t’as l’imbarras : J’ai m’doule ! J’ai m’prone ! J’ai m’dache ! J’ai m’caramèle ! J’ai eune rute kerke ! J’sus quervé des quates pattes !

Quéqu’un qui a toudis soif ; un bos sins soif : I a été sevré aveuc eune queue d’sauret ! Ou : I bot com’ un tro et pus i bot, pus i a so !

Quéqu’un qui a eune tiête d’ivrogne : I a nin eune tiête à chucher des glachons ! Et cor’ : I chuche nin qu’des glachons !

Quéqu’un qui n’peut pon boir’te, in dit : I est au régime d’chirop d’parapluie ! Et cor’ : I s’a saoulé in chuchint d’el glache !

Slogan anti-alcool : I s’noe pus d’gins dins ches verr’ qu’dins toutes ches rivières !

Pou excuser l’apéro aveuc un ami : I vaut miux boir’te à deusse que d’s’in pacher tout seu !

Pou eune mauvaisse bière : L’bière alle sint l’maronne du brasseux !

Bin sûr, mes gins, te peux t’renseigner su l’liquide in d’mindant : Quo qu’te bos ? Dins tous ches cas, chi te bos aute cosse que d’l’ieau ou du soda, i n’fot pon oublier d’inviter tin ami Modération !