L’chinquième République bis…

Mardi 22 juillet 2008 2 22 /07 /Juil /2008 12:33

L’chinquième République bis…

Chalut mes gins ! Révolution à’ch’t’heure, in vit dins l’nouvielle chinquième République. Te vos, rin qu’in lissant cha, t’as l’imprechion qu’eut vie alle a chingé. Bion, j’n’ai pon l’habitude de faire d’el politique, mais i fot bin admette qu’in n’a pon gramint d’actualités à s’mette sous l’dint. Alors in va s’continter d’cha ! Mais à m’mote, te dos bin t’in douter. Alors j’ai révisé ches citations qui parl’tent d’politique. Quind te sais qu’i y in a qui ont été écrites i y a des lustres, te n’peux que t’dir’te eune cosse, l’politique, ch’est vraiment la continuité dins l’ching’mint. Eune aute fachon élaborée de dir’te qu’in fait du surplache !

Jean-Jacques Rousseau :

Chi j’étos législateur, j’n’perdros pon min timps à dir’te quo qu’i fot faire, j’el f’ros ou j’em tairos.

Coluche :

Le technocrate, ch’est eune personne que, quind te li pos’tes eune question, eune fos qu’i a fini d’te réponte, te n’sais pus quo qu’te li as posé com’ question !

Georges Clémenceau :

Ch’ti qui quitte tin parti pou aller dins un aute, ch’est un traître. Ch’ti qui vient d’un aute parti dins l’tien, ch’est un converti !

Pierre Dac :

L’artique seisse d’el Constitution n’dot sin existince qu’à ch’quinsse qui l’précède et l’diss-chept qui l’suit !

Nicolas Machiavel :

In politique, l’chox i est rar’mint intre l’bien et l’mau, mais intre l’pire et l’mointre mau.

Coluche :

J’f’ro aimabl’mint armarquer à ches hommes politiques qui m’prenn’tent pou un rigolo que ch’est nin mi qui ai comminché.

Alphonse Allais :

Avint d’éblouir l’peuple in li promettant l’ieau caude, i faut li fournir ches récipients pou l’ arcueillir !

Henri Queuille :

L’politique, ch’est pon d’résoudre ches problèmes, ch’est d’faire taire cheuls qui les pos’tent.

Voltaire :

I n’y a pon d’grind conquérint qui n’sot d’grind politique. Un conquérint ch’est un homme dont l’tiête s’sert, aveuc eune habil’té heureusse, de ch’bras d’autrui.

V’là mes gins. In aurot pu cor’ continuer pindint des paches tell’mint l’sujet i s’y prête bin. Mais te peux toudis compléter cheule liste dins ches commintaires. Com’ dins tout bion spectaque, i fot un rappel. Alors com’ j’t’intends crier « eune aute, eune aute ! » In v’là eune dite par Napoléon Bonaparte : « In politique, eune absurdité n’est pon un obstaque ! »