Chalut mes gins ! Ben cha y est, l’s’maine alle arcomminche mais j’sus pus mate que vinderdi. J’n’sais pon pou ti, mais mi, j’ai fait quatorsse juillet de cham’di soir à lundi soir. Cha fait gramint, mais quind in a querre à cha, in n’compte pon ! J’vais faire un résumé, chi te veux bin. Après t’auras tout loiji d’commenter et d’raconter quo t’as fait, ti…

In a comminché par faire un tour dins l’pat’lin d’à côté, à Marquette-lez-Lille, d’ù qu’in a pu découfrir deusse groupes d’là : ches rockeurs du groupe Vintage, qui arprenn’tent ches canchons classiques du Rock’N’Roll, pis l’groupe Evasion qui arprind, li, des canchons pus ressentes des canteurs anglo-saxons. Mention chpéciale à Emilien du groupe Evasion qui, harnaiqué in femme, com’ Freddy Mercury, arprend « I want to break free » aveuc eune vox à faire pâlir ches finalistes d’el Star’Ac. Bravo ! Pis, après ches vedettes américaines, com’ i dit, ch’étot l’tour d’el grinde vedette : Dave. Te sais, ch’est l’canteur qui vient d’l’aute pays du fromache. In visite com’ un ami, i arrife au volant d’ch’carette tout simplemint. Ben, in tout cas, mes gins, quind i est su scène, t’es vit’ au courant ! I t’met eune ambianche d’folie. I n’tient pon in plache et t’as qu’eune invie, ch’est d’canter et d’bouger com’ li. Vraimint, mes gins, ch’est un vrai canteur. L’playback i n’est pon dins sin vocabulaire. Par un doux Tam-tam, i t’immène du côté de chez Swann pou vir chi Vanina alle est toudis occupée à danser à’ch’t’heure, pindint qu’i déclame à Laura qu’sin cœur i est malate.

J’te pache l’diminche pou v’nir direct’mint à ch’quatorsse juillet. In est allé à Wattrelos. Nin ! Rin à vir aveuc eune batalle d’Napoléon. Cha s’vot qu’t’étos toudis à côté de ch’radiateur chi te confonds ! D’ailleurs, te fais l’même erreur chi te pinses à cheule canchon du groupe Abba. Sous un solel radieux, in avot rindez-vous au Parc du Lion vers seisse heures trinte. Lal, mes gins, in n’peut pon parler d’vedette américaine. In a eu deusse spectaques complets car monsieur l’maire i n’avot pon fait ches cosses à mitan. In premier, un artiste ch’ti qui fait eune carrière nationale : Eric Baert. Un imitateur d’grind talint. Ch’est pratique quind t’invites eune vedette com’ cha. T’as tous ches grinds d’el canchons et même ches grindes, in un. Et in est paché allégremint de Henri Salvador à Yves Montand. De Francis Cabrel à Patrick Bruel. De France Gall à Amanda Lear. In pachant par Nougaro, Bécaud, Dutronc, Presley, Bigard, Laspalès et j’in oublie gramint… I no a même invité in guests star, Jean-Claude Van Damme, ch’ti qui parl’te mais qu’in n’comprind rin à ch’qu’i dit. Et, bin sûr, l’grind Johnny à qui i fai un clin d’oeul à travers ches leunettes…

Pis après, mes gins, su l’cop d’disse-huit heures, l’grinde Sheila ! L’école alle est finie mais te t’souviens quind même d’toutes ches paroles et te cantes aveuc alle. Aveuc eune pêque d’infer, portée par ches tros choristes et deusse dinseurs, alle te fait un vrai show. Alle est là, d’eune présinche indiscutape, inflammant l’scène. Et i fait caud, vit’ caud. Nin seul’mint passque l’solel i tape mais auchi passque ches gins is s’prenn’tent tertous à dinser su plache et à faire écho à ches paroles. Et te v’là importé à te laicher danser tindis qu’alle te dit que ch’est ti qu’alle aime. Guettant ches rois maches qui suiv’tent le vaisseau chpatial de Spacer. Love be baby, qu’in crie in attindant d’canter sous l’pluie, qui n’est pon au rindez-vous et ch’est très bin. Mais Bang-Bang, in a caché s’poupée d’porcelaine. Mais ch’est nin grafe, in est arparti auchitôt pou un medley disco des années Chic… Sheila, ch’est choc ! In in ard’minde, alle t’in armet cor’  in grinde pro qu’alle est. Eune grinde Dame d’el canchon françésse…
Boum ! Pfaf ! Vlan ! Ziiii… El bouquet final a été à Lille sous ches fûx d’artifice d’ù qu’in fêtot ches quate chints ins du Québec ! V’là mes gins, com’ t’as été bin sache, te vas avoir l’drot à eune imache. Nin, carrémint tros…