Chalut mes gins ! J’n’ai pon résisté à plaiji d’sortir, mi auchi, min nouviel album aveuc quatorsse nouvieaux tites. Après Chéline, me v’là arpartie à m’printe pou Carla. A mi toute seu, j’vais bintôt faire tout ch’Top chinquante ! J’vais t’faire min explicachion su l’chox d’ches textes et ches titres…

1 – Ma jeunesse

Ch’est nostalgique passque cha n’a pon été fachile tous ches jours. Mes parints avotent eune grinde très mason. Quind j’avos b’soin d’câlin, i fallot attindre que m’man alle arrife par l’un de ches couloirs et com’ alle n’marchot pon vit’, souvint j’avos peur d’ête abindonnée et j’brayos.

2 – La possibilité d’une île

Ch’est inspiré par min Nicolas. A forche d’révolutionner l’France, i va finir par s’croir’te Napoléon. In va finir su eune île, que j’li avos dit… Infin, i in a d’jà arpéré eune à ches Bahamas !

3 – L’amoureuse

Ch’est cor’ pou min Nicolas. Tous ches jours, i m’surprind. Te t’souviens quind j’avos raconté qu’i avot arfait ch’film de Dany Boon dins not’ champe. I a toudis un truc in stock pou éviter l’routine. Ch’est pou cha que j’ai écrit l’tite suivint…

4 – Tu es ma came

Ch’est eune bielle déclaration, te n’treuves pon ? Mi, j’n’peux pus m’in pacher. I fot toudis qu’j’sus aveuc li, partout d’ù qu’i va. J’n’pouvos nin canter : « J’irai d’ù qu’te iras, min pays s’ra ti ». Chéline alle m’avot d’jà pris l’idée…

5 – Salut marin

In arvient à not’ île. Pon question d’aller faire ches commissions in biclou, i y a d’l’ieau partout ! I fot bin qui pache sin permis batieau. I n’peut nin toudis imprunter l’yacht d’un ami aveuc sin équipache.

6 – La tienne

Pon d’commintaires mes gins ! chi te veux savoir d’quo cha parl’te, t’as qu’à acouter ches paroles. Mais nin, ches initiales ch’est pon SM mais SN…

7 – Péché d’envie

Ch’est com’ cha ! I y a toudis qué cosse qui m’fait invie. Alors i fallot bin que j’aborne ch’sujet. Et pis, com’ cha, cha va p’t’ête li donner des idées quind i s’ra in panne sèque…

8 – You belong to me

Ch’est in souv’nir de not’ voyage in Egypte. Aveuc ches Pyramides, ch’Nil et ches bieaux couqués d’solel. Min Nicolas, i m’appartenot à plein timps…

9 – Le temps perdu

Ch’est l’inverse d’el précédinte. I travalle trop et pindint ch’timps, j’sus seu. J’ai écris cheule canchon dins un momint d’solitute. Te t’rinds compte ti, j’n’l’avos pon vu d’pis dousse heures ! Ch’étot vraimint du timps perdu pou mi.

10 – Déranger les pierres

J’dis dins l’refrain que j’voudros déranger ches pierres mais min Nicolas i m’a dit qu’in n’pourrot pon démonter not’ palais pou l’arfaire su not’ île. Nin, ch’est eune blaque ! Quind in fait queuette dins l’campagne, ches pierres alles devienn’tent rouches in ravisant not’ amour… Ch’est bieau et poétique, hein ?

11 – Je suis une enfant

Quo, cha vous étonne qu’j’cante que j’sus eune infant malgré mes quarinte ins. Malgré mes trinte amints. Ch’est quo qui vous gêne ? Mes ins ou min palmarès ?

12 – L’antilope

Ch’est eune métaphore, te dos bin t’in douter. Passque min Nicolas i m’appell’te plutôt « m’gazelle ». Cha veut dire qu’j’sus l’air du timps, j’cours et j’croque l’vie à pleines dints.

13 – Notre grand amour est mort

Ch’est d’el fiction ! I n’fot nin croir’te tout quo qu’in dit. I fallot bin qu’j’m’imagine l’pire pou savoir quo qu’j’pourros faire sins min Nicolas. Cha m’fait pon rir’te car j’pourros auchi in faire eune canchon…

14 – Il vecchio e il bambino

Cha veux dir’te l’viel homme et l’quinquin. Ch’est in italien passque ch’est quind même min premier parlache.