Chalut mes gins ! I fallot bin qu’cha m’arrife. Après avoir lu tout ch’qu’in a dit su l’v’nue de Chéline Dion à Arras et après avoir vu ches reportaches à la tévé régionale, j’ai été atteint de Chélinite aiguë  pindint l’nuit. Te m’connos, j’ai ches neurones qui font souvint des excès d’vitéche. Te m’diras, i vaut miux cha que d’faire du surplache com’ chertains ! Alors quind Morphée i est v’nu m’printe dins ches tiots bras musqués, min echprit i ch’est mis à pinser québécois…

« Mais Habille ! Habille ! » que j’avos crié à René. Ch’est min mari chi te n’le savos pon cor’. Ch’ti lal, i étot in train d’préparer eune liache d’billets qui planquot discrèt’mint dins sin smoking in faisant ch’ti qui querchot un mouchoir dins s’poque. I fot qu’j’t’explique que, quind j’chantos tous ches soirs à Las Vegas, li, pindint ch’timps_lal, i dépinsot ches sous que j’gagnos à l’force d’m’vox dins ches casinos. Infin, i fallot bin qu’i s’occupe un tiot peu pindant qu’j’faisos boullir l’marmite. Ch’est d’em faute. A l’baraque, in avot gramint d’gins qui faisotent tout quo qu’i y avot à faire et min René, qui avot querre à bin s’occuper du ménache, i treuvot l’timps long. Alors in ch’étot mis d’accord pou qu’che sot li qui époussète tous ches Disques d’Or et tous ches trophées. Mais forcémint, com’ in étot pon à l’baraque et bin i s’innuyot, min René. « Allez min René, is sont tertous in bas, i fot qu’in y aille. In a d’el route à faire. » Pis in faisant des gros biecs à René-Charles, ch’est min garchon, chi te n’l’savot pon cor’. J’li dis : « Te vas ête bin sache aveuc ta mamie et tes nounous. Maman alle va à traval. Chi te veux, te peux invoyer des textos à tin père. Mi, j’n’pourros pon t’réponte mais i m’dira quoi dins ches orellettes. Passque tin père i s’imagine qui va juer à casino à Arras, mais i n’y en a pon. I d’vra faire com’ avint, raviser maman d’ches coulisses ! »

In étot arrifé in châr d’Nice. Pardon, mes gins, in n’va pon m’comprinte chi j’utilisse des mots québécois. J’voulos dir’te qu’in étot arrifé in carette. Infin, vu l’taille de la carette, in pourrot press’que dire un bus ! Pouquo Nice ? Ch’est pon passqu’in n’avot pon treuvé d’hôtel pus près, mais ch’est passque j’avos mes habitutes. Qu’min méd’cin personnel i m’avot dit qu’l’climat du Nord-Pas-de-Calais, ch’étot nin terripe pou m’vox. Que min chirop d’érape i n’s’rot p’t’ête pon achez efficache !

L’route avot été bionne juss’que l’entrée d’Arras. I avot gramint d’monte à cosse d’un festival qui s’appelot Le Main Square. Cheule carette, alle n’étot pon fachile à conduir’te dins des rues auchi tiotes. Nouzôôtes, ches canadiens, in fait com’ ches américains. In prévoe des rues tell’mint grindes qu’in pouvot fachil’mint mette six carettes d’front ! Infin, ch’est vrai, ichi, i y a gramint moins d’plache que dins min pat’lin. M’première impréchion étot l’suivinte : Arras, tin univers i est impitoyape ! Pon d’plache pou laicher pacher l’grinde Chéline et sin cortèche…

A mes gins, i a fallu juer des coudes pou que j’arrife dins ches coulisses. In fait, com’ ch’concert i étot in plein air, ch’étot un grind car aveuc des vitres d’ù qu’in voyot pon à travers. Cha m’rapp’lot min infanche quind j’allos faire du campinge aveuc toute l’famile dins ches paysaches d’rêfe de not’ bielle province d’Québec.

-         Allez min René, sors-mi l’thermos d’tisane à chirop d’érape. I fot qu’j’cauffe m’vox. La, la, la, la, la la, la… Mi, mi, mi, mi, mi, mi, mi…

-         Tiens, ma bielle, tin remète.

-         Merchi min René ! que’j’li répondis in avalant l’jatte qu’i m’tindot. Ré, ré, ré, ré, ré, ré, ré… Fa, fa, fa, fa, fa, fa, fa…

-         Ca va ? T’in veux cor’ un peu pus ?

-         Nin, j’in ai achez pou l’momint. Attends, in va faire l’test : La, la, la, and you’re here my heart, and my heart will go on and ooonnnn ! Te vois, min René, cha à l’air d’aller. In n’a pon trop d’remous, tout baigne. L’tout ch’est d’n’pon couler, com’ d’habitute…

-         Ah ! min Chéline, t’es vraimint l’meilleur’ mais te n’devros p’t’ête pon canter cheule chanson ichi ch’soir.

-         Pouquo j’n’pourros pon canter cha, min René ?

-         Bin j’ai lu dins ches journaux françés qu’l’Titanic i faisot d’l’ompre à un grind artiste qui étot d’ichi, infin pressque.

-         Ch’est pon min problème, min René ! L’grinde Chéline alle est obligée d’canter l’Titanic ! Te sais bin qu’ch’est cha qui brisse l’glache d’habitute ! Ch’est m’guiffe d’proue. Min radieau survie pou tous ches gins, min public ! Tint pis pou l’aute mais, mi, j’la cante ! Te t’imagines, ti, un concert d’Barbara sins qu’alle eut canté sin aigle noir’te qui s’étot involé du côté de Gottingen. Dalida sins qu’alle eut canté qu’in d’vot la laicher dinser à l’fiête d’un ami, Gigi, qui venot d’avoir disse-huit ins avint qui parte à Rio do Brasil. Line Renaud sins qu’alle no cante d’es cabane au Canada d’ù qu’alle a emmené l’quien qu’alle a vu dins eune vitrine d’Armintières ; vraimint eune p’tite folie. Johnny sins qu’i alleume sin fû à sang pou sang pou ches bieaux zis d’Gabrielle. Adamo sins qu’i tripot’te ches hanches in draguant l’file qu’i avot empruntée à monsieur pindint qu’alle tombe l’neiche. Dave sins s’Vanina qui part’te faire un tour du côté de chez Swan pou aller danser à’ch’t’heure. Mireille Mathieu sins qu’alle mette Paris in colère passqu’alle a ram’né mille colompes aveuc alle et qu’cha fait gramint d’fiente su ches statues. Sheila qui n’laich’rot pon ches gondoles à Venisse… Nin, cha, ch’est pon un bion exempe. Ch’est nin stape eune gondole. Cha li a coulé sin mariache. Bion, qué qu’i y a cor’ ? Ah bin Pierre Perret sins qu’i fasse l’lechon su tous ches modèles d’zizis à Lily, Olga et toutes ches autes ! Tins, et même chez no, ches québécois. Robert Charlebois qui n’arviendrot pon d’Montréal. Diane Dufresne qui n’rencontrerot pon l’homme de s’vie. Min copain Roch qui n’s’rot pus seu su l’sape à cosse d’Hélène. Et Fabienne Thibeault qui s’artrouv’rot seu dins sin lit et qui n’pourrot pus dormir ches uns conte ches autes !

-         Ch’est bion, min Chéline. Te m’as convaincu. In va la faire alors ! Tint pis chi ches gins is crie’tent qu’is vont l’arcouler ch’Titanic.

-         Eh bin, cha m’a donné soif, tout cha ! Ardonne-me un cop d’tisane à chirop d’érape ! Cha y est, m’vox alle est caude com’ eune braisse. All by myself don’t wanna live, all by myself anymooooorrrreee !

-         Ouais, te l’as invoyé grafe, min Chéline! J’en ai l’chair d’glaine ! Mais j’espère que t’as prévu des tites in françés. Passqu’ichi, in n’est pon très douté aveuc l’parlache des autes…

-         Mais oui, min René. Te n’cros pon qu’j’avos oublié ches canchons d’Jean-Jacques et même cheules d’Michel Berger. On ne change pon même chi min ami m’a quitté. J’irai d’ù qu’te iras car j’dinse dins m’tiête ! J’n’vais pon t’en faire pus long. Armonte ch’fermeture éclair d’em rope ! Dins tros minutes, ch’est à mi…

Voilà mes gins quo qu’i peut arrifer quind in s’prind pou Chéline. J’avos même réussi à caser l’Titanic dins min rêfe. Ches gins is avotent tertous canté aveuc mi. Com’ quo, l’musique alle adouchit ches mœurs. Quind min René i laicha tomber un glachon dins sin whisky, après ch’concert, cha m’réveilla in sursaut. Vas donc savoir pouquo un glachon i m’avot fait ch’t’effet-lal…