Gardincourt, station balnéaire…

Mardi 8 juillet 2008 2 08 /07 /Juil /2008 12:04

Gardincourt, station balnéaire…

Chalut mes gins !

Ben, chi te m’lis à’ch’t’heure, ch’est, qu’ti, auchi, t’es nin parti in vacinces. Infin, t’es p’t’ête à Gardincourt, eune célèpe station balnéaire qu’in a tous testé au moins eune fos dins s’vie. Commint, te n’connos pon Gardincourt. Bin t’es de ch’Nord ou pon ? Mi, j’y sus allé en ouiquen’. J’vais t’raconté cha…

J’m’étos l’vée sam’di matin pon trop tôt. Passque pou aller à Gardincourt, i n’y a pon d’raison d’partir à eune heure où même ches cos is sont in train d’dormir. Donc, j’avos pris min timps, préparé min panier repas. Gardincourt, ch’est nin loin, ch’est cha qui est bin ! In pus, aveuc ch’pétrole, qui est auchi quer que ch’lite d’pinard, ch’est pratique. Te fais des économies. Te peux aller à Gardincourt in sindalettes, in espadriles et même aveuc tes pintoufes Mickey chi t’as nin invie d’chinger quo qu’t’as à tes pids. J’avos eu d’el chince, i n’y avot vraimint pon d’circulation et j’étos arrivée in deusse s’condes. Pou ch’timps, ch’étot nin l’idéal. Ches nuages is muchotent l’solel. Cha, ch’est l’problème à Gardincourt. In n’a pon toudis du timps superbe. Alors, i fot prévoir dins tes bagaches un grind parasol. T’es in train d’te dire pouquo un parasol alors que Marie Toutoule alle vient d’dire qu’i n’fait nin bieau. Bin, te peux toudis l’utiliser in parapluie chi l’cas i s’présinte ! Ch’est ch’qu’in appell’te l’doupe fonction. J’sais, l’canchon « un p’tit coin parapluie » alle prind eune toute aute diminsion… Te peux auchi prévoir dins tes affaires d’printe, toudis pou ches même raisons, un K-way, com’ min Dany, ou un pull chi t’as vit’ frod. Mi, j’avos auchi mis min bikini dins l’espoère d’printe un bain d’solel. Te parl’tes ti, d’un bain d’solel ! J’ai eu l’douche gratis. Min parapluie-parasol, in moins d’timps qu’i n’in fot pou l’dire, i arsimblot à eune wassingue qu’te sors d’l’ieau sins la tordre ! Ch’est là d’ù qu’t’appréhindes tout l’sins de station balnéaire.

Infin, j’in arviens au fait que Gardincourt, chi ch’est nin loin pou y aller, ch’est nin loin auchi pou in arvenir ! Et ch’est tint miux passque, là haut, is ont ouver’te ches vannes in grind. Is ont dû s’gourer in ravisant l’calindrier et is ont confondu juillet aveuc noviembre ! Cha, ch’est p’t’ête dû au fait qu’là haut, is ont du solel, eux, et qu’is in ont pris un cop su l’tiête !
V’là mes gins, commint te finis tin ouiquen’ d’vint la tévé aveuc rin à raviser. Passque ches gins d’la tévé, eux, is sont partis in vacinces. Là d’ù qu’i a gramint d’solel ! Allez, pou t’armonter l’moral, j’ai quind même pinsé à t’invoyer eune carte postale…