Chalut mes gins !

Te comminches à m’connaîte, mi, j’sus eune fan d’el canchon françésse. Auchi, d’timps in timps, j’traîne dins l’quartier d’Wazemmes d’ù qu’in peut découvrir gramint d’nouvieaux talints. Un soir, j’sus atterrie dins un estaminet, Le Relax, d’el plache d’el Nouvielle Avinture. Chi te préfères, l'plache du marché d’Wazemmes. Mes orelles, toudis à l’acoute d'musique, alles ont été attirées par ches réglaches d’gins qui étotent in train de s’préparer pou un concert. Alors,  j’sus allée vir d’quo i s’agissot ! 

Millard, i y avot gramint d’monte ! Mais ch’étot qui cheule vedette qui attirot autint d’gins ? Après avoir jué des coudes, alors que ches autes is les levotent dur’tes, chi te vos d’quo j’parl’te, j’sus arrivée près d’ches musicos. Ah, Ch’étot li, j’l’arconnaissos, Monsieur Rémi in chair et in oches ! Ajustant ches cordes, la hauteur de sin micro et préparant sin cahier, com’ un écolier, d’ù qu’i peut suifre la trame du concert qui va no offrir. Commint, ti, te n’connos pon Monsieur Rémi. Eh ben, te n’vas pon gramint fur’ter such’ Net ou su Myspace ! I fot sortir un peu, chinon te vas finir momifié d’vint t’tévé ! J’vais d’voir parfaire tin éducation musicale. In y va…

D’jà, Monsieur Rémi i a fait d’el musique toute s’vie. Quind i étot tiot, i juot d’el flûte traversière, alors qu’ti, te juos du pipo. Pis, pus i grandissot, pus i apprenot à juer des grinds instrumints. Ch’étot com’ eune boulimie, eune drogue. Après sin BAC, i va même décrocher un diplôme d’musicologie. Bin sûr, l’guitare alle le démingeot auchi. Ch’est même s’marque de fabrique à’ch’t’heure. Monsieur Rémi est auchi un grind dévoreur d’musique. I acoute d’tout. D’el variété françésse, du jazz mais auchi du classique…
Cha vie in noir’te et blanc, j’parl’te d’ches notes, te dos bin t’douter, mais aussi, ches illusions et désillusions font sin vécu. Des expérïenches, des délires, des amours que Monsieur Rémi trinscrit par des textes simpes su des mélodies ajustées. Observateur d’el vie, v’là eune définition qui li va com’ un gant. Et pou préserver s’pur’té, Monsieur Rémi ne s’prind pon au chérieux. I cante même qu’i est con, con, tell’mint con, com’ pou miux exhorter ches détracteurs à pacher leu chemin. Eux qui n’ont jamais rin compris au tiot Rémi. Monsieur Rémi évolue dins sin bulle, et i s’plait à l’faire savoir. Pourquoi eune bulle ? Mi, j’sus sûr qu’ch’est pou s’préserver d’el bêtisse humaine ! Blop, blop, blop…

Après eune heure d'canchons, Monsieur Rémi et ches acolytes ont trinsporté tout l’public dins un univers d’poésie. I règne com’ un goût trop peu… Mais com’ l'vrai pro qu’i est, Monsieur Rémi prind l’timps d’parler à l’un et à l’aute. J’sais d’quo j’parl’te, j’ai eu l’grind honneur d’pouvoir partager quéques minutes aveuc li. Eune cosse est sûr’te, ch’est que Rémi est un grind Monsieur !