Arvue d'presse N° 005

Vendredi 9 mai 2008 5 09 /05 /2008 18:12

Misse in bière...

J'sais pon chi te fais partie d'ches gins qui ont toudis eune idée pus drôl'te ou pus farfelue qu'l'voisin, mais in tout cas, t'auras du mau à batte un américain d'l'banlieu d'Chicago. Ch't'homme d'67 ins, i est pus buveux d'bière qu'in régimint d'ch'tis. Ch'est sin régal ! Alors, i a tout prévu pou sin passache d'in l'au-delà. I a commindé à ches croque-morts un cerceul ch'pécial, nin com' tertous. I a déchidé qu'in li f'rot à ches mesures eune canette d'bière, d's'marque favorite, et qu'i s'rot interré lad'dins ! Et com' i n'a pon d'problème aveuc sin pouvoère d'achat, li, i a demindé à eune mason d'décoration d'soigner ches détals !

Gramint d'tralalas pou qu'in pisse dire qu'sin interr'mint étot fait in grindes pompes... ed'bière !

Mi, j'te l'dis, mes gins, i y a un marché à prindre ! In peut imaginer qu' l'femme aux bijoux alle fasse fabriquer in écrin géint pou sin r'pos éternel. Que ch'banquier, in l'interre dins un coffre-fort ! Ch'pêqueux dins eune boîte d'sardine ! Ch'boulinger dins in pain et ch'facteur dins un colis postal ! Oh, j'allos oublier ch'bradeux d'Lille. In pourrot li faire eune moule géinte d'ù qu'in mettrot in décor des frites et eune bière, pardi !...