Chalut mes gins ! Rin qu’in lisant ch’tite, te dos t’dire : « cha y est, Marie Toutoule alle a cor’ rêfé d’not’ première Dame et ch’est arprisse pou alle ! » Ben ouais, mes gins, t’as raison ! L’aute soir, j’ringeos des viux journaux pou les mette à l’poubielle arcyclape. In feulletant ches paches, j’sus r’quée su l’artique d’el projection privé du film d’min Dany Boon à l’Elysée. Et forcémint, com’ j’l’ai arlu d’eune traite juss avint d’aller vir Morphée, te sais, ch’est cheule qui permet d’t’indormir, min cerveau i s’est mis in ébullition sins rin m’d’mander…

In avot paché eune soirée sins trop d’protocole. Min Nicolas i avot fait pou mette à l’aise tous ches invités. Mi, j’avos t’nue m’plache, in complimintant l’un, en complimintant l’aute. D’toute fachon, j’avos pon à faire l’service, in avot des gins pou cha ! Et tout ch’étot paché sins accroc. In avot même ri d’vir toutes ches péripéties d’ch’facteur. Même chi min Nicolas i n’étot pon ravi d’vir des imployés d’l’France picoler pindant l’serviche ! Mi, j’avos découfert commint qu’in vifot dins l’Nord. Qu’in pouvot avoir des masons toutes tiotes aveuc que deusse ou tros pièces seul’mint. Te sais, cha n’est pon pou juer les moqueux d’gins, mais mi, j’avos l’habitute d’grinds espaches. Dins l’mason d’mes parints, quind te voulos aller faire pipi, t’avos intérêt d’prévoir quéques minutes avint les grinds flots, chinon t’avos d’fortes canches d’mouiller ches tapis des couloirs. Et pis quind te voulos aller t’coucher aveuc t’jatte d’chocolat caud, et bin, i n’l’étot pus quind t’arrifos à tin lit ! Ch’est p’t’ête pou cha qu’in a invinté ch’micro-onte !

Min Nicolas i avot toud’même du mau à digérer ches mini-fricadelles qu’in no avot chervies. Mais ch’est du d’voir d’un Présidint d’montrer l’exempe, qu’i m’avot dit. Auchi, fort ed’cha, i avot égal’mint goûté à l’bière de ch’Nord. Cha n’avot certain’mint pon été cha meilleu idée car i n’avot pas l’habitute d’boire. Cha li faisot faire des gazoullis dins l’vinte. Et chi t’as d’jà intindu dire qu’min Nicolas i n’manquot pon d’air, te dos bin t’imaginer dins quelle chituation j’m’artreuvos ! D’autint qu’cha n’l’impêchot pon d’pinser à un aute d’voir, moins présidintiel, ch’ti lal. Te peux pon chavoir ch’qu’in peut ête influinché par ches films. Et quind in vient d’raviser pindant eune heure et d’mie l’avinture d’un facteur, cha donne des idées à min Nicolas. I voulot poster sin lette dins m’boîte.

Quo que j’pouvos faire ? L’coup d’l’grèfe churprisse, j’li avos d’jà fait quind in étot arvenu d’Ingleterre. J’n’pouvos pon, nin pus, li dire qu’sin affrinchiss’mint i n’étot pon chuffisant. S’fierté d’co alle en aurot pris un cop et i m’aurot fait du jus d’boudin pindant trop long. In pus, j’li avos d’jà dit qu’ch’étot com’ l’tour Eiffel, alors i n’m’aurot certain’mint pon comprisse. J’n’pouvos pon li dire qu’l’guichet i étot fermé. Quind i a eune idée, i n’lâche pon com’ cha. T’as qu’à vir aveuc toutes ches réformes. Tel qu’j’l’connos, i s’rot arv’nu à l’rouverture ! Alors, j’avos déchidé qu’in f’rait eune levée chupplémintaire.

A l’fin du traval, in étot serin. Min Nicolas i contimplot ch’plafond et mi, com’ toudis, j’comminchos à fredonner eune d’mes canchons : « In m’dit qu’nos vies alles valent pon grind cosse, alles passe’tent in un instint com’ alles passe’tent ches rosses. In m’dit qu’l’timps qui glisse ch’est un salaud, que d’nos mourons i s’in fait des mantieaux. Pourtint, quéqu’un i m’a dit… »

Et tout i s’pacha com’ eune lette à l’poste… Sauf à l’fin d’l’tournée, car min Nicolas i eut eune drôl’te d’idée. Ch’étot p’t’ête à cosse que l’jus d’houblon avot quéque peu artourné ches idées. Infin, d’un cop, i m’dit com’ cha :

-         Diminche, on s’ra M et Mme Smith, j’ai l’invie d’aller faire un tour à Beurgues incognito !

-         Incognito, incognito, qu’j’li avos répondu. Ch’est fachile à dire, min Nicolas. T’oublies qu’in a not’ photo partout dins ches magazin’ !

-         Aveuc ti qui es douée in maquillache et pis des fouffes qu’in a pon l’habitute d’mette, cha d’vrot donner l’chanche !

-         Ch’est cha, donner l’chanche ! Même ed’dios in t’arconnot, min Nicolas ! Ou alors, I fodrot te déguisser in Dany Boon aveuc un K-Way rouche d’ù qu’in n’verot sortir qu’tin nez. Alors, cha pourrot p’t’ête l’faire. Mais te risques cor’ qu’in t’demande des autographes, car ch’est eune vedette, ch’ti lal !

-         Mais nin, min Carla ! Ches gins is pourron’tent jamais croir’te que ch’est nous les vrais . In no prindra pou des sosies et in s’ra lipe d’faire tout quo qu’in veux !

-         Et in y va commint dins tin pat’lin ? Chi te cros qu’te peux arrifer incognito dins tin grosse carette d’présidint, intouré d’tous ches chips in pétoire, ch’est qu’l’gaz d’l’bière i est monté grafe dins t’boîte à neurones !

-         Nin, min Carla ! In ira aveuc t’mini. Personne i la connot. In pus, cha s’gare n’importé d’ù. In f’ra juss attintion à ches radars. Mais j’sais d’ù qu’is sont alors…

-         Nin, min Nicolas ! Mi, j’l’sins pon tin plan diapolique. Et pis t’oublies qu’in a d’jà qué cosse à faire, diminche.

-         Bion, ch’est com’ te veux, min Carlinette d’Amour. Mais, dins ch’cas, in va faire ch’film à no deusse, dins not’ chimpe !

-         T’es vraimint pompette, min Nicolas !

-         Donne-me chinq minutes ! J’arviens aveuc tout quo qu’i faut ! Ti, pindant ch’timps-là, Mets-te in t’nue d’combat.

-         Quo te veux dire ?

-         Prinds un d’mes jeans, un d’mes marcels et eune casquette, in va arjuer ch’film !

* *

*

Au bout d’quéques minutes, v’là min Nicolas d’artour aveuc deusse grinds sacs plastiques d’ù qu’i avot dû mette ches accéchoires d’cinéma d’quartier. I s’arnaiqua com’ mi, aveuc eune aute casquette. Bin sûr, ch’étot pon écrit « La Poste », i y avot un quéva cabré. Com’ chi nos amis ches facteurs is avotent déchidé d’abindonner l’vélo pou l’bidet ! Pis, i m’demanda d’fermer ches zis et d’me laicher guider juss’qu’à l’couloir. Forcémint, j’n’allos pon l’contrarier. Alors quind i m’dit qu’i allot installer ches gadgets in plache, j’avos gardé ches zis bin fermés pou li faire plaiji. Mais j’étos quind même inquiète d’intindre quéques bruits bizarres…

-         Vas-y, te peux raviser ! m’dit-il d’un ton glorieux, au bout quéques secondes.

Là, tertous is von’tent croir’te qu’j’affabule, mais min Nicolas i avot mis à l’intrée d’l’chimpe, sus’ mur, eune feulle d’papier blanc. I avot déchiné tout autour un grind bord rouche et avot inscrit in lettes capitales :  « BERGUES ».

-         Vas-y, Carla, in va rintrer dins Beurgues ! ajouta-t-il. J’ai tout prévu pou qu’in pisse faire ches babaches com’ is dis’tent !

Et évid’mint, quind min Nicolas i avot déchidé d’faire l’fiête, j’savos qu’cha n’allot pon ête trisse ! Pou avoir tout prévu, i avot tout prévu. In a bu des bières, in a bu du café aveuc Gen’vièfe, com’ dins ch’film. I m’avot même fait goûter ch’fromache qui pute. Et j’li avos rétorqué qu’cha s’rot de ch’faute chi m’bouque alle n’sint pus l’rosse !

Pus qu’in faisot simblant d’aller rindre visite à ches habitants, pus qu’min Nicolas i simblot s’amuser. I avot même mis in bruit d’fond un cédé d’cloches. Ti, j’te vos bin. T’es in train d’lire cha et te t’dis mais ch’est qui ches cloches qui cantent su l’cédé. Des noms, des noms ! Mais te n’y es pon. Ch’étot vraimint  l’inregistremint d’vraies cloches. Te sais, aveuc tous ches cadeaux qu’i rapporte d’ches visites officielles, in pourrot ouvrir un grind bazar ! Auchi, j’n’sus pus étonnée quind i m’sor’te des trucs étranches ! Infin, arvenons à not’ tournée des bistrots, car i a voulu auchi faire un tour au « café du Nord » pou boire eune pinte. Et j’n’étos pon arrifer au bout d’mes churprisses ! V’là t’y pon qu’min Nicolas i m’intraîne juss’qu’à l’salle d’bain. I no approche d’l’baignoire d’ù qu’i avot mis d’l’ieau. A plein mitan flottot un tiot batieau in plastique. J’cherchos instintanémint dins m’tiête quelle scène du film i voulot arjuer, car j’avos pon l’souv’nir d’un navire dins l’histoire. Mais j’avos du mau à faire l’point car, même chi l’cédé d’cloches i s’étot arrêté, j’avos l’impréchion qu’alles carillonnotent toudis dins m’cerveau.

In moins d’timps qu’i n’en faut à eune gernoulle pou gober eune mouque, min Nicolas i sortit sin baguette présidentielle et commincha à arroser à grind flot in visant l’batieau. Pis su l’ton vainqueur du capitaine qui crie à l’abordache, i dit :

-         J’m’in va couler l’Titanic, cha f’ra plaiji à min Dany !!!