Min porte-bionheur, rin pou vo...

Mercredi 30 avril 2008 3 30 /04 /Avr /2008 16:35

Min porte-bionheur, rin pou vo...

Est-che que te l’savos…

Cheule tradition du muguet alle est in route edpis el 1^er mai 1561. Cache pon ! T’étos nin né et mi nin pus…Ch’étot Charles Disse moins un qui déchida d’in offrir à toutes ches Dames d’l’cour passqu’i in avot r’çu un brin et qu’in li avot dit qu’cha allot li porter bonheur !

Bin pus tard, el 1^er mai 1886, ches ouvreux américains is ont foutu l’brein pou obtenir eune journée d’seul’mint huit heures d’traval. Chous l’pression, l’plupart des patrons is ont accepté. Quéques années pus tard, in 1890, in Europe, ches ouvreux is ont auchi manifesté. Is mettotent à l’époque un triangle rouge à l’boutonnière pou chymboliser tros parties égales d’l’journée : traval, sommel, loijis.

Ch’étot in 1907 qu’in déchide d’prindre l’muguet com’ chymbole du 1^er mai. In dot cha aux Parisiens, passqu’l’muguet étot chynonime du printimps in Ile d’France.

In 1919, el 23 avril, l’sénat i déchide d’accorder el 1^er mai suivint com’ jour chômé à tite exceptionnel.

In 1941, alors qu’ches alleminds is no occup’tent, el 1^er mai fut décrété « Fiête du Traval » mais ch’étot juss un jour chômé !

Et ch’est in 1947, après l’libération, qu’in déchida d’in faire un jour férié et payé !

Edpis, l’plupart d’ches pays d’Europe is fiêtent el 1^er mai…