Cyril Paulus, quind l’âme d’l’canchon françésse treuve un nom…

Samedi 26 avril 2008 6 26 /04 /Avr /2008 15:51

Cyril Paulus, quind l’âme d’l’canchon françésse treuve un nom…

Chalut mes gins ! Chi te l’sais pon cor’, j’aime bin acouter d’l’musique. J’sais pon ti, mais mi, j’acoute d’tout et chi in comprind l’parlache, ch’est cor’ miux ! Mais par d’sus tout, ch’que j’appréchie l’pus, ch’est ches canteurs et ches canteusses qui ont eune Vox, aveuc un grind V. Et min sing i n’a fait qu’un tour quind j’sus tombé sur l’cédé de Cyril Paulus qui s’appell’te « Banquise ».

Ch’est sin premier album, mais in dirot qu’i a fait cha toute s’vie ! Et cha n’est pon étonnint, vu qu’i est tombé dins l’musique quint i étot tiot. Te t’rinds compte, ti, à dousse ans, i est l’chef d’sin premier groupe les Falcon, et à seisse ans, i est l’canteur-guitariste d’Bittersweet.

Après avoir tricoté, aveuc des tiotes notes, des mélodies pou ches autes, pis des connus, quind même, com’ Roch Voisine, not’ cousin du Québec, « Ne n’oublie pas », Angun « Juste avant toi », le Roi Soleil « Etre à la hauteur », et pis in vrac : Thierry Amiel, Jonatan Cerreda, David Charvet, i s’décide infin à faire des musiques rin qu’pou li su des paroles de Jane de Boy. Et, in février 2007, Cyril décroche l’trophée de « Jeune Talent de l'année ».

Sin album « Banquise » i est plein d’amour, de tindresse, mais pon d’l’gnognote juss pour faire grimper sin chiffe d’affaire. Nin ! Cyril Paulus i cante des chujets chérieux com’ l’adoption, l’violince conjugale, l’mort d’Vincent Humbert aveuc un tact et eune ret’nue sins parel. Ches mélodies, misses in valeur par s’vox, vo transpercent d’part in part. In n’peut pon rech’ter indifférint ! Ou alors, ch’est qu’in n’a rin compris à l’musique et qu’i vaut miux artourner juer à mapes.

Aveuc dousse canchons, Cyril no immène dins sin univers, tout in finéche. Et là, te peux juss dire à l’fin du cédé : « Vingt dius, 47 minutes d’bonheur, cha pass’ vit’ ! » Mi, j’te’l’dis, mes gins, Cyril Paulus i est d’jà dins l’cour des grinds d’l’canchon françésse et i va y rech’ter pou in bion bout d’timps ! Te peux m’croir’te, parole d’Marie Toutoule !

Messache personnel à Cyril, chi i ravise min chite : Merchi pou tin gentillesse et tin simplichité ! No, dins l’Nord, in aime bin ches gars du Chud, d’Montpellier, pou cheuls qui l’saven’tent pon cor’. Et te sais, quind un ch’ti i aime quéqu’un, ch’est pon du chiqué, ch’est pou l’vie ! Te peux v’nir no vir quind te veux, pou no canter des canchons, Marie Toutoule alle s’ra là pou t’applaudir et, chi te veux, alle f’ra même l’cuisine pou t’faire découfrir ches plats de ch’Nord, car alle est auchi fichelle bleue !

A’ch’t’heure, mes gins, i fot que j’t’monte à quo i arsimpe Cyril, pis sin album.