Un mois d'jà !

Jeudi 17 avril 2008 4 17 /04 /Avr /2008 14:20

Un mois d'jà !

Chalut mes gins ! Te vos, j’intretiens min corps d’rêfe, car ch’est churtout ches dogts qui travallent su l’planque à boutons d’min manicraque informatique. A’ch’t’heure, je veux juss écrire quéque lines pou dire merchi à tertoutes et à tertous pou l’soutien et l’fidélité don vo m’f’tes preufe !

Cha fait d’jà un mois que j’vo raconte mes invintures, et tout quo qu’i pass’ par l’tiête et qui m’interpell’. J’espère que vo appréchiez min traval et que vo v’nez m’vir le pus souvint possipe. J’sais, d’après vo témoignaches, que vo aimez bin que j’m’prenne pou Carla et vo attindez l’suite. Patienche, mes gins. In va pon parler qu’d’cha ! Même chi, effectiv’mint, y a gramint à dire su l’chujet…

D’ailleurs, chi ti auchi t’as quéque cosse don t’as invie d’parler, te n’dos pon hésiter ! Marie Toutoule répond à tertous par maiye (chi te n’sais pus, ch’est hein@marietoutoule.com). Alors, ti auchi, t’as l’parole !

In a tertous un rôle à juer pou not’ parlache so arconnu ! Cha n’est pon eune mote com’ j’ai pu l’intindre d’la part d’certains. P’t’ête des jaloux qui n’ont aucin sins d’l’humour ! Ch’est eune façon s’arconnaîte intre no et continuer c’que nos parints, nos mémères et pépères is faisotent…

Pis, dins ch’Nord, in aime bin tertous et in n’est pon chectaire…

No, su nos bindroles, y a pon d’insultes mais juss « bienvenue ! »

L’vie n’est pon rosse tous les jours, mais in a l’humour et l’rire pou no soigner !

Te vos, j’pouros press’ ête l’minitre d’l’bionne humeur. Fodra j’in parle à min Nicolas ! ;)

Mi, min rôle, ch’est d’vo faire pacher quéque minutes d’bonheur dins vot’ journée. Alors i fot que tertous m’soutienne’tent. Te peux d’jà mette tin adresse maiye dins « ches niouzes » sins crinte, y a qu’d’mes nouvielles que t’auras. Te peux auchi invoyer l’adresse du chite à tous tes amis, et même cheuls que t’aimes pon gramint ! Et pis, chi te m’aimes vraimint bin, t’as eune aute rubrique, juss in d’sous, d’ù qu’te peux faire un don pour l’fonctionn’mint d’min chite.

Allez, ad’main tertoutes et tertous !