Au pays des gins qui parlotent seu…

Lundi 14 avril 2008 1 14 /04 /Avr /2008 13:13

Au pays des gins qui parlotent seu…

Chalut mes gins ! J’sus allé faire ches commichions dins eune grinde churfache, et tout in pouchant l’chariot, j’ai vécu un drôl’te d’truc. Te sais, j’en loupe pas eune. J’aime bin observer tertous. Mais là, j’ai eu l’sintiment qu’min intind’mint i étot parti aux abonnés abchints. I fot qu’j’te raconte à’ch’t’heure…

J’venos d’quitter cheule braf’ file qui m’avot pris gramint d’euros pou pon grind cosse. J’ravisos ches vitrines des magasins dins l’galerie. Ah, qu’j’m’étos dit, chi seul’mint tous ches numéros d’lot’rie is étotent sortis, j’pourros in faire des folies. A mi seu’, j’f’ros armonter ches affaires d’tertous. In attindant, j’étos bin obligée d’m’continter des imaches. Te sais, quind t’es dins eune galerie marchinde, chi te ravises bin, t’as l’imprechion d’ête su eune route. T’as cheuls qui roul’tent à drote, cheuls qui roul’tent à gauche. T’as cheuls qui s’arrêtent dins tin cul passque te t’es arrêté sins prév’nir. T’as cheuls qui font l’course pou ête arrifés pus vit’ à l’caisse principale, d’ù qu’i y a toudis du monte. Et t’as toudis ches babaches qui vont in zig et in zag passqu’is ont pon eu leu permis d’chariot ou qu’is ont trop participé à ches stinds d’foire à pinards. Mais, chi te ravises bin, i y a auchi eune aute catégorie : ches gins qui parlotent seu !

J’sais bin que ch’est nin des branques évadés d’un asile. Nin, ch’est tous ches gins qui parl’tent aveuc eune orellette bloutousse, et qui ont l’téléphone portape muché dins leux poques. Te sais, ch’est com’ un apparel pou miux intindre, mais là, t’es fier com’ l’biroute d’un bar tabac et te l’montres à tertous ! In va faire juss eune parinthésse pou expliquer ch’que ch’est un portape. In appel’te auchi cha un GMS. Et te sais ch’que cha veut dire : Gamelle Mobile Servitute. Même chi t’as invie d’ête à calme, t’as toudis quéqu’un qui t’sonn’te pou t’rapp’ler qu’t’as oublié chi, oublié cha ; qu’te dos ram’ner chi, ram’ner cha ! Bref, qui ramène ch’grinde gamelle partout d’ù qu’t’es !

Et quind eune téléphoneusse (1) parle à sin loulou et qu’alle in crois’te eune (2) qui rouspète sin mari, bricoleux in plomb’rie, passqu’i a eune inodation à l’mason, cha donne un dialoque étranche :

1 : Ch’est mi, min loulou in chuque…

2 : Cha, ch’est bin ti !

1 : J’ai eune idée pou ch’soir…

2 : Incroyape, cha !

1 : Commint t’l’dire…

2 : Y a un sait quo qui n’tourne nin rond…

1 : J’n’treuve pon ches mots…

2 : In va faire court : Tin robinet i est out !

1 : Mais j’brûle d’amour pou ti…

2 : A’ch’t’heure qu’i y a d’l’ieau partout, in risque pus l’incindie !

1 : J’ai invie d’ti…

2 : J’arrife, mets te in t’nue combat !

1 : Armet c’que j’t’ai offert pou tin anniversaire…

2 : L’waders en caoutchouque pou l’pêque à guernades…

1 : Ou plutôt min cadeau d’Sint-Valintin…

2 : Quo, te n’veux pon l’mette…

1 : L’stringe chexy com’ ches Chippendale !

2 : I n’fot pon que l’niveau i monte !

1 : J’n’peux pus attindre…

2 : J’fais l’pus vit’ possipe ! Mais te peux commincher tout seu !

1 : Commint faire quind te n’es pon là…

2 : Utilisse bin tes mains pou eune fos. J’termin’rai l’traval, ch’est d’jà pon chi mal !

V’là, mes gins ! A’ch’t’heure, quind te téléphon’ras d’un magasin ou d’ailleurs, te f’ras attintion p’t’ête un peu pus à ch’que te dis… In attindant, chi te lis tous ches (1), pis tous ches (2), t’as deusse histoires in pus pou l’même prix !