Salut, mes gins ! Te t’souviens, l’s’maine dernière, j’ai rêfé que j’étos l’première Dame d’France et, qu’aveuc min Nicolas, in est allé vir l’reine Elisabeth Deusse. Ben, com’ in in parle cor’ partout, min sommel m’a jué eune nouvielle fos l’tour !

Min Nicolas et mi étottent rintrés à not’ palais, à Paris, un peu mates. D’vir tous ches Inglais et d’faire toutes ches courbettes, cha avot mis des douleurs partout dins min corps d’top modèle. L’première cosse à faire étot pacher dins l’salle ed’bain et plonger dins des bulles. I n’y a rin à faire, in est toudis miux à s’baraque qu’dins eune qu’te n’connos pon ; même chi t’as tout quo qu’i fot.

Cha faisot du bin. Toutes ches tiotes bulles d’mousse, j’avos mis l’bain-moussant aveuc l’sintimint d’rosses, comminchotent à m’détindre. I m’prenot même l’invie de cantonner. Tertous i l’sait, j’ai un bieau brin d’voix. Et m’v’là partie à poucher min sérénate : « quate consonnes et tros voyelles, ch’est l’prénom d’Nicolas. J’l’murmure à min orelle et chaque lette m’émervelle… » Là, j’te dis que j’m’sus gourée dins l’prénom, mais te comprinds bin qu’j’aie dû faire un armix. Ch’étot li min homme à’ch’t’heure ! Pis, j’avos pon invie qu’i m’fasse eune crisse d’joulouz’té passque j’pinsos cor’ à l’aute.

Au bout d’eune heure, j’étos arsortie des ondes. Cha, ch’est min côté poétique pou dire qu’j’sors d’l’ieau. J’avos mis l’tiot insimpe d’nuit qu’min Nicolas i m’avos offert in Ingleterre. Passque ch’est bin gintil d’faire du protocole, mais i avot fallu visiter auchi ches magasins d’Lontres ! J’savos qu’cha allot ête sin première préoccupation : m’vir dins l’insimpe qu’i m’avot chosi. D’ailleurs, i allot vraimint m’vir, passqu’i étot pon gramint épais l’tissu qu’is avotent utilisé pou faire cheule fouffe !

Eune douche leumière venot d’el champe. Min Nicolas étot là, assis sus’ lit, appuyé su un coute. Il s’étot mis à l’aise li auchi. Il avot inlevé sin costume et s’artrouvot in cal’chon. Chi te veux tout savoir, mais te gardes cha pou ti, car ch’est un s’cret, ch’est l’drapieau inglais. Cha l’amusot com’ un boubourse d’savoir qu’i pouvot s’assir su l’Ingleterre. Infin, arvenons à not’ histoire. Te dos bin t’douter qu’ches conchidérations politiques, alles n’étottent pon l’priorité du momint. Quind i m’a vue dins chimbrinle d’l’porte, aveuc l’éclairache qui v’not du couloir, in aurot dit l’leup dins ches déchins animés d’texte avait ri. Et pourtint, j’n’avos pon mis l’musique d’neuf s’maines et eune d’mi !

Et v’là min Nicolas qui comminchot à m’faire eune drague du diape :

-         Ô Carla, com’ t’as d’bieaux queveux !

-         Ch’est passque j’utilisse l’shimpog Pasquejeulvobin, j’li répondis.

-         Ô Carla, com’ t’as d’jolies mains !

-         Ch’est passque j’leu fais faire l’exerchisse aveuc min guitare, que li j’répondis cor’.

-         Ô Carla, com’ t’as d’lonques gambes !

-         Ch’est génétique. Toutes ches femmes dins l’famile d’m’mère, ch’est parel !

-         Ô Carla, com’ t’as deusse bieaux … 

-         Ch’est cha ! qu’j’l’interrompis. In n’va tout d’même pon faire tout l’cycle d’anatomie in eune fos ! J’vos bin d’ù qu’te veux in v’nir, min Nicolas ! Ch’est pas dur’te à comprindre ! T’as l’drapieau qui s’ardresse tout seu ! In dirot qu’in a déplaché l’tour Eiffel pou l’armette in Ingleterre ! Mais mi, j’sus mate usée ! In pourrot faire eune pausse quind même. T’as d’jà oublié qu’in a fait tous ches arcoins du château d’Ouïne-Sort. Même qu’in a failli s’faire avoir à cosse d’tous ches imployés d’mason qui sont toudis in train d’astiquer qué qu’cosse. Et pis, t’oublies l’visite nocturne dins ches écuries et quind t’as voulu m’faire vir toutes ches carettes dins sin garage privé, à Elisabeth. Mi j’n’ai pon oublié qu’te m’as fait l’cop à tros arprisses, dins l’Rol’che, passqu’alle étot insonorisée et qu’in n’pouvot pon no intindre. Chi cha continue, j’vas d’voir déposer un préavis d’grèfe pou ches vingt-quate heures et arconductipes in pus !

-         Ô min Carla… qu’i chuchurra alors lingoureus’mint.

-         Nin ! I n’y a pus d’Carla ! Armets don tin craïon dins sin étui, in n’va pon chigner d’accord cheule nuit ! J’sais bin qu’te prônes l’fait qu’in doiv’te toudis ouvrer pus, mais là, j’n’veux pus heures supplémintaires imposées ou non. M’pointeusse alle est in raque, mais j’sais qu’j’ai d’jà larg’mint dépaché ches trinte-chinq heures pou l’semaine !

 
Et v’là, mes gins, ch’est toudis quind cha d’vient intéressant, qu’in sort d’sin rêfe. A cosse d’euch camion d’poubielles qui fait un ramdam ed’ diape ! Vu l’heure, j’m’lève. Vif’mint euch’soir qu’in s’couche ! J’saurai, p’t’ête, commint min Nicolas i va faire à l’tape des négochiations pou arrifer à obtenir s’prime !