Toutoul'Tarte au Maroilles

Dimanche 6 avril 2008 7 06 /04 /Avr /2008 12:38

Toutoul'Tarte au Maroilles

J'sus sûre qu't'as un tiot creux. A force d'lire toutes mes avintures, tin estomac i s'artrouve in lachet ! Alors chi te veux, j'vas donner min r'cette d'tarte au Maroilles. Te vas vir, même chi t'n'es pas une ficelle bleue, te n'peux pon l'rater. Sauf chi, quind te l'auras mis dins tin four, te vas in vadroulle, faire du léque-vitrine ou j'sais quo d'aute.

Pou t'faciliter l'vie, te peux acater eune pâte toute faite. Mi, j'avos eune préférince pou eune feulletée mais chi te n'aimes pon, tu prinds eune brisée ou tu l'as fait ti même.

V'là quo qui t'faut d'aute :
- 1 Maroilles « mignon », te sais, c'est ch'ti qui fait inviron 360 grammes.
- 3 œufs (pon d'autruche ni calle, j'te laiches d'viner)
- 300 grammes d'fromache blanc (te peux prindre du zéro pou chint, ch'est toudis cha in moins).
- 150 grammes d'fromache à tros rapé.
- Poifre. (Ne mets churtout pon d'sel, l'Maroilles et l'rapé, ch'est déjà assez salé !)

Te peux préparer t'tourtière (28cm, i fot tout t'dire !) et mette l'pâte d'dins. Te peux auchi mette tin four in précauffache à 200 degrés inviron (ch'étot l'7).

Dins eune jatte, même qu'in appell'te cha un cul d'poule, ch'est pas des conn'ries, te mets les œufs intiers (t'inlèfes quind même les coquiles), te mets l'fromache blanc et te bats l'apparel pou qu'i soi'te homogène. Te poifres, te peux i aller, ches bion pou tin santé. Te mets l'fromache rapé et t'artoulles cor'.
A'ch't'heure, te copes ch'Maroilles in dés d'inviron deusse cintimètes d'coté, et eune fos qu't'as fini, ben t'as t'dots qui pu'tent mais ch'est normal et nin grafe ! Te mets ches dés dins l'mixture qu''tavos faite et te toulles incore. Pon l'peine d'écraser ches dés, chi i ress des tiots bouts ch'est très bin !
V'là, i ress pus qu'à vercher tout l'apparel dins tin fond d'pâte et t'l'mets dins l'four pou inviron 35 à 40 minutes. Eune bielle couleur dorée pou ête sûr d'l'cuichon !

Mi, j'la minge in intrée, mais te peux auchi la minger in souper aveuc eune salate verte !
Chi te fait attintion à t'line, t'as qu'à sucher des glachons !
Bion appétit !

Chi t'as rin compris ou qu'te veux ête sûr, invoie-me un maiye, j't'artournerai l'version francésse !
(si tu n'as rien compris ou que tu veux être sûr, envoie-moi un mail, je te renverrai la version française !)