Arvue d'Presse N° 004

Samedi 5 avril 2008 6 05 /04 /Avr /2008 11:45

Arvue d'Presse N° 004

Misse in boîte !

Cha i est mes gins, ches autes, d’ù qu’i y a gramint d’tulipes, des trucs qu’in dot pon fumer et du fromache rouche, is on’tent invinté des boîtes à ouvreux in étutes !

Chi, ch’est vrai, te peux m’croi’te ! Is on’tent pris des cont’nères com’ sus ches bateaux, et aveuc cha, is on’tent fait des tiotes cahutes. I y a tout ch’comfort pou un ouvreux in étutes. T’imagines dins la rue quo qu’cha peut donner quind l’un i rinconte l’aute :

- Chalut ti !

- Chalut !

- D’ù qu’te ress à’ch’t’heure ?

- Dins une boîte passqu’i avot pus gramint d’plache dins ches immeupes !

Cor heureux qu’l’aute i so révéllé passqu’i aurot pu croir’te qu’i vivot dins un cercuel’ à cosse d’un coté un peu gothique, te sais, ch’ti qui vit in noir et blanc !

Te peux auchi superpoler, allez, in va même extrapoler, et impiler ches cont’nères pou faire ches bureaux. Pou l’accuelle, buquez à l’porte du cont’nère un. Pou l’cerveau d’l’intreprisse, pardon, j’voulos dire l’secrétaire ed’direction, i fot aller à ch’numéro dousse. Pou l’grind manitou, ch’est l’cont’nère tout in haut, d’ù qu’i fot monter tous ches échelons. Pou l’photocopieusse, te dos t’dandiner jussqu’au quinsse. L’manicraique à jus et ch’ti à soupe, d’ù, in général, i y a pus d’monte, in les a collé in deusse et tros, au niveau ches vaques. Forcémint, comm’ i y a toudis pus d’pods qu’dins ches étaches, in appell’te cha eune pausse, i fallot ête sûr que ches taules alles n’pli’tent pon. Et pou ches autes, ches collaborateurs et collaborateusses, chacun l’sin ! J’avos oublié ch’ti pou les pipis, ch’est pas négligeape. Et quind te chinges d’intreprisse, te pars aveuc tin bureau ! Com’ cha, te n’as pon b’soin d’arprendre toutes ches babioles que t’avos mises pou qu’l’décor i ressimpe à tin personnache.

Ch’braf’ Nicolas Appert quind i invinta ches boîtes d’conserfe vers l’fin du disse-huitième siècle i n’aurot jamais pinsé, qu’un jour, ch’étot les ouvreux in étutes qu’in mettrot in boîte !

Te peux t’acater cha ichi : http://www.tempohousing.com/