Un bieau matin, qu’eul solel i brillot à travers les feniêtres, j’m’sus révéllée aveuc eune idée in tiête. J’en parlos auchitôt à Pépette, qui avot l’air d’accord aveuc mi, et qui encourageot m’idée par des baisses baveusses sur m’guiffe. J’sais bin, par momint, j’ai des idées que j’n’sais pon commint faire, mais lal, i y avot pon d’raisons qu’les autes is y arrifent et nin mi. I fallot qu’j’compe min artard technologique ! Mi auchi, j’avos l’drot d’churfer sus’ Net, d’envoyer des maiyes et découfrir des autes villaches sins bouger eune gambe d’l’mason.

Ch’étot i y a quéque timps, et chi t’m’lit, ch’est passque j’avos franchi l’pas. J’va raconter cha…

J’étos fin prête. Je partos à l’avinture dins la grinde ville d’ù qu’on peut treuver un magasin qui vind des manicraques informatiques, et même qu’is appel’tent cha PéChé ou Maque. Mi, j’savos déjà qu’i fallot que j’acate un PéChé, comme l’ress d’l’bande.

L’bus i s’arrêta à l’gare. I fallot à’ch’t’heure qu’j’me débroulle pou treuver la rue d’ù qu’i y avot la boutique d’Benjamin ; quéqu’un que j’connaissos un peu. Sin traval ch’étot cha, i rabistoquot des PéChés qu’les gins avotent débouliqués, et i vindot auchi des neufs.

Ch’est bin passque j’n’avos nin l’timps, mais i y avot de bielles vitrines. De bieaux magasins d’fouffes. Seul’mint, je n’avos pon un Prince Charmin qui m’avot laiché euch’cébé pou juer à Prétiwouman’. Et min pouvoère d’achat i étot auchi quéhu qu’mononque Marcel d’sin équelle quind i avot voulu chinger ch’ampoule d’cuisine ! Deusse mois dins plâte, cha li avot vallu. Te m’dira, i étot bin réparé à’ch’theure. Infin, arvenons à min préoccupation du jour, min artard technologique. J’avos dû prindre tous ches euros dins min tir’lire et j’espéros qu’i y in avot assez. T’es déjà in train te dire, connaichant Marie Toutoule, ch’est un gros porchieau rosse qu’elle avot mis dins sa champe ! Et bin, nin ! Marie Toutoule, alle avot mis tout sin magot dins une boîte in fer d’ù qu’i étot marqué farine, dins cha cuisine. Te comprinds l’ach’tuche : farine d’blé, blé… Te veux pon un déchin quind même !

Tout in léquant ches vitrines, mes pas m’avotent condui’tes devint s’boutique. Je poussos l’porte in verre, et là, j’eus eune drol’te d’impression. Marie Toutoule, alle étot dins eune aute diminsion, ch’est sûr. Alle avot frinchi un couloir du timps, un monte parallèl’ com’ in dit dins ches films fintastiques. A vir tous ches manicraques in marche, min Benjamin, devint, i ressemblot à ch’père Spoque dins Chtartrèque. D’autint, mais ch’étot nin de s’faute, i avot des grindes orelles.

-         Bonjour, Benjamin ! te m’reconnos, j’sus Marie Toutoule. Ch’est mi qui fais les commichions pou tin pépère Raymond !

-         Oui, bien sûr. Comment allez-vous Mademoiselle Toutoule ?

-         Fin bénache, chi t’arrêtes tin parlache d’cérémonie ! J’sus Marie Toutoule, nin la reine d’Ingleterre ! Et j’sus v’nue pou t’acater un Péché.

-         Vous savez déjà si vous voulez un fixe et un portable ?

-         Un fixe ! J’ai pon b’soin d’un portape. J’sus un peu étourdie, comme in dit. J’arrife déjà pon à artreuver euch’zappette d’l’tévé quind i fot. Alors, j’in veux un qui ress là d’ù qu’j’le mets, et qui boug’te pon !

-         Vous avez un budget, peut-être ?

-         Ch’est sûr, min fiu ! Marie Toutoule, alle n’a pon braqué eune binque, ni gagné à l’lot’rie. T’en a pou sept chints euros ?

-         Sans problème. Vous allez en faire quoi, principalement ?

-         A’m’mote, j’ai invie de churfer sus’ Net. J’veux auchi envoyer des maiyes, pis écrire tout quo qu’i m’passe dins l’tiête pou in faire profiter tertous, su un blogue, qu’alle a dit cha appelot, Yvette. J’sais auchi qu’in peut vir des cosses, et Marie Toutoule alle a invie de connaîte plein d’cosses.

J’avos l’impression qu’j’passos d’vint un commichaire d’poliche qui posot des questions su eune affaire grafe. Et v’là, Marie Toutoule alle étot such’pecte d’vouloir acater un manicraque informatique. Mais ch’est com’ cha. Benjamin i faisot sin métier, i voulot m’dégoter exact’mint ch’ti j’avos b’soin.

* *

*

L’lind’main, j’étos excitée com’ eune puce qui découfre un quien qui sort du toilettache. Benjamin, i avot dit qu’i faisot livrer min PéChé. J’avos fait d’plache su min bureau. J’v’nos juss d’pacher un tiot cop d’fouffe, pou inl’ver ches poussières, quind min carillon m’canta l’annonche d’un visiteur. Marie Toutoule, ch’est mi, alle arrifa pus vit’ à l’porte qu’un vint arrière su eune tape in formica, mais ch’étot quind même Pépette qui gagna l’course.

Ch’étot Noël avint Noël. Com’ un tiot quinquin, j’déballos mes paquets et comminchot à les mette in plache sus’ bureau. Seul’mint là, mes gins, eune suée alle m’vint. J’étos bin obligée d’admette que cha n’étot pas chi simpe d’artrapper min artard technologique. I y avot gramint d’fils et morcieaux. In aurot dit un pezeul’ ! Mais quo qu’i t’a pris, Marie Toutoule, que j’m’étos dis à mi même. T’auros pon pu garder tin pactol’ pour acater eune sait quo pu utile. Ch’étot com’ cha, quéque fos, j’étos in pétard toute seu, et j’m’ronchonnos d’sus…

Tous ches tiots bouts is dévotent ête brinchés sus l’gros bidule qu’in appell’te eune unité chentrale : l’planque à boutons, l’écran elchédé et l’mulot. Benjamin i avot proposé un mulot sins queue mais, toudis à cosse d’min étourdiss’mint, j’avos préféré l’modèl’ aveuc fil ; com’ cha, j’étos sûre qui pouvot nin partir sins mi. J’pouvos, com’ dins la canchon, l’attraper par l’queue chi alle voulot juer à muche-muche. M’tiête alle devot arssimbler à cheule de ch’acteur qui voulot brincher sin fil rouche sus’ bouton rouche et sin fil bleu sus’ bouton bleu et qui découfre, in fait, que ches boutons is étotent pon dins les bionnes couleurs ! Et j’comminchos à croir’te qu’in fait d’unité chentrale, ch’étot plutôt eune chentrale nucléaire. Pouvu qu’in brinchant ches fils, j’n’fasse pon exploser tout ch’quartier !

J’te passe ches détails, mes gins, car Marie Toutoule alle faillit faire chauter sin fusipe d’bion fonctionn’mint. J’avos bieau raviser l’déchin que Benjamin i m’avot mis aveuc l’manicraque, l’artourner dins tous ches sins, pou mi, ch’étot auchi clair que du jus d’boudin. J’in étos toudis aveuc l’même chox : dins quel tro chaque bitoniot devot rintrer ? J’sus sûre qu’in lisant cha, te t’arvos quind t’as acaté l’tien.

Mais Marie Toutoule alle n’est pas née aveuc d’el dernière drache. Alle avot just’mint acaté à mon Benjamin passqu’i y avot un ésavé d’qualité. Auchi, quitte à m’faire pacher pou eune babache, j’avos app’llé à l’aite.

* *

*

Benjamin i étot v’nu après sin traval. Il avot détoullé tous ches fils. Bin ouais, Marie Toutoule alle avot fait du tricotache. J’étos dev’nue SpiderToutoule in un rin timps ! Cha, au moins, ch’étot dins mes fils, pardon tertous, j’voulos dire cordes. J’avos eu l’drot à eune lechon d’démarrache. Benjamin i m’avot expliqué commint qu’i fallot faire pou commincher aveuc un PéChé. Il m’avot expliqué ch’base qu’in appell’te le tecope-tecolle. Ch’étot magique, hein ? In n’a pon b’soin d’arcopier com’ un babache. Chi in avot eu cha in clache. L’maîte i aurot pu no punir in no faisant arcopier chint lines «  ej n’dos pon bavader in clache », in aurot gagné du timps pou faire ches cons ! Mais ch’que j’avos préféré dins cha première lechon, ch’étot quind i fallot arrêter l’manicraque. T’as nin rigolé, ti, quind la première fos, pou arrêter, in t’a dit qui fallot aller dins démarrer. Vraimint, ches gins qui on’te invinté cha, is aurotent dû l’faire avint d’ête kervés des quate pattes !

Benjamin m’avot fait prindre un abonn’mint à Internet aveuc eune boc’xe. Des boc’xes, i y in a gramint. I y in a couleur oranche, des neufes qui n’ont pon cor servi, des fris, cha ch’est quind Marie Toutoule alle brinche ches fils d’travers, et même eune qu’in appell’te Aliche, mais j’sais pon chi alle fait des mervelles. Min Benjamin, que j’li avos dit, te fais à’t’mote. Mi, ch’que j’veux, ch’est pon avoir d’mouron aveuc toute cheule technologie.

V’là, mes gins, te sais à’ch’t’heure commint j’peux écrire à tertous dins l’monte sins aller à l’poste ! Ti auchi, te peux m’écrire car Marie Toutoule alle a eune adresse maiye. Ch’est : hein@marietoutoule.com. J’sus pon cor’ experte in informatique, mais j’m’débroulle. J’m’accoutume au parlache d’ordinateur. J’grafe des dévédés ; j’mets ches documints in sauv’garte su eune clé uessbé. Tous mes dogts is sont pus en pus agiles sus’ planque à boutons. Mais à’ch’t’heure, j’va m’arrêter là. Car tous ches tapotaches cha finit par m’donner soif ! Marie Toutoule alle va prindre congés et aller s’boire une pinte !

Juss avint, alle va t’raconter l’blaque qu’i m’a dite Benjamin : « Ches informatichiens, ch’est com’ ches canards : cha parot calm’ in surfache, mais cha pédale comm’ des boubourses par in d’sous. »