Chalut mes gins ! A’ch’t’heure, j’vais t’parler de ch’meilleux momint d’el journée et, in même timps, ch’pire. Ch’ti d’ù qu’te dos te l’ver ! Ch’est vrai quo ! Ch’est toudis quind t’es bin. Tin corps d’athlète i est bin arposé. T’as cor’ l’tiête dins ches rêfes et t’as ch’foutu rével qui ch’met à faire un raffut de ch’diape ! Alors, in princhipe, in s’lèfe. In est bin obligé ! Mais, quéqu’fos, in appui’te such’ boution pou clouer ch’bec à ch’maudit truc d’brein… In va dir’te machinal’mint. Forcémint, cha n’loupe pon, in arpart auchitôt au pays des rêfes…

Te peux n’ête sûr’te, mes gins, à un momint donné, t’as ches neurones qui ch’mettent in brinle-bas d’combat. In dirot qu’is sav’tent lir’te ch’t’heure ou qu’is la d’vin’tent. Tes zis is s’oufr’tent pus vit’ que l’éclair et t’tiête alle va automatiqu’mint raviser dins l’direction de ch’rével. Te s’ros un manicraque électronique, in dirot d’cha qu’ch’est eune initialisation. Cor’ un tiot cop d’misse au point, heureuss’mint qu’in t’a équipé d’autofocus. Cha y est ! Millard ! Vingt dius ! Ch’est nin possipe ! D’un cop, t’as l’impréchion que ch’t’heure alle s’prind pou eune inseigne au néon d’un grind magasin. Te n’vos pus qu’cha ! Même chi t’as eune vision d’taupe… Ch’est à ch’momint préchis qu’tin cervieau i calcul’te que ch’est l’heure d’ù te dos ête à tin traval ! Alors, après, j’n’ai pon b’soin de t’faire un déchin !
Tous ches trucs d’ù qu’i t’faut gramint d’timps, pou les faire habituell’mint, lal, ch’est du rapite ! Ch’est com’ chi in mettot l’film in accéléré. D’un cop, te paches d’l’état d’viux taco aveuc précauffache à l’état d’Formule Un ! Seul’mint, tin film i n’armonte pon ch’timps. I n’fot pon esjagérer. Donc, t’arrifes quind même in artard à ch’traval. Ch’est ainchi, mes gins, qu’in a invinté cheule fameusse panne d’oreller. Pratique, ch’est nin de t’faute ! Tin oreller i ch’est ligué aveuc tes draps pou t’impêquer d’sortir de ch’lit ! Dins ch’Nord, in dit alors qu’in est farcé. In est même ch’dindon d’el farce qu’in a provoquée, pisqu’in a appuyé such’ boution et qu’in est arparti auchitôt dins ches bras d’Morphée !
Mes gins, in va p’t’ête, à ch’t’heure, pouvoir invoquer eune raison médicale. In va pouvoir esspliquer à ch’patron, qui fait des bonds, qu’in est obligé de ch’ménager pou raisons d’sinté, voire d’survie. J’in connos qui ont d’jà pris gramint d’avinche… Infin, is s’arconnaîtront. Ches essperts d’el « Sleep Society » is vienn’tent de ch’réunir in congrès in Allemagne. Alors, ch’est des gins qui s’occup’tent de ch’sommel, te l’auras d’viné. Is n’sont pon v’nus lal pou improvisser eune fiête d’el bière ! Très sérieuss’mint, is vienn’tent d’mette in pièches l’théorie de ch’braf’ Napoléon. Ch’ti chi i avot dit : « Quate heures d’sommel pou ches hommes et chisse pou ches babaches ! » Mi, j’n’in connos pon gramint qui arrif’tent à t’nir eune moyenne auchi bache sins arsimper à des zombies in quéques jours ! Ch’Napoléon, in n’sait pon à quo i carburot, mais ch’étot un sacré gaillard !
Ches essperts in roupillon affirm’tent qu’ches tiots dormeux is risqu’tent d’mourir jonnes. In pus, is risqu’tent auchi d’flirter aveuc l’déminche ! Vraimint, mes gins, te comprinds, in lisint cha, qu’in risqu’te gros quind in s’lèfe ! Com’ i pourrot dir’te Gérard Holtz : Mobilisons-no, ress’tons couqués !
Mais cor’ miux ! Ches essperts is affirm’tent auchi que ches gros câlins du soir, cha vaut tous ches trinquillisints pou lutter conte l’insomnie ! Cha, ch’est eune idée qui va plair’te à gramint d’gins ! No, ches femmes, in n’pourra pus dir’te qu’in a mau à l’tiête. Pach’que chi in n’dort pon bin après, cha s’ra pir’te ! In va d’voir chinger ches habitutes, ch’est eune question d’survie ! Mais, ches hommes, in a dit gros câlins. In n’a pon dit, nin pus, qu’i fallot faire eune overdosse tous ches jours. Ch’est t’sinté qui in dépind auchi. Chi te n’dors pon assez, ch’est l’asile qui t’guette ! Ch’ti qui va in abuser, ch’est parel à ch’ti qui aval’te l’boîte complète d’pilules. Ch’est du chuichide ! Com’ j’dis toudis : User, nin abuser pach’qu’après in est usée !

J’in connos d’autes qui von’tent ête contint : Cheule Sécu ! Cha va fait gramint moins d’somnifères à rimbourcher… Pis, à ch’t’époque du bio, ch’est plutôt bin qu’in rimplache un produit chimique par un truc chint pou chint naturel ! Par conte, j’in connos un qui va ête contrarié. Ch’est min Nicolas 1^er ! Li qui est toudis in train d’prôner qu’in dot travaller pus. I va falloir qu’i treuve eune aute méthote ch’i n’veut pon s’artreuver aveuc eune France d’morts-vivants ou eune colonie d’gins qui ont des fuites dins l’toiture… Com’ i disot Henri Salvador, ch’traval ch’est l’sinté, mais rien faire, ch’est la conserver… J’vais aller m’arcouquer pou méditer cha, mes gins !