Chalut mes gins ! A’ch’t’heure, in va parler tévé. Nin, j’n’vais pon t’faire un cours su cheule nouvelle technologie HD. Même chi j’pourros dir’te, au passache, qu’in va infin vir, grâche à l’haute définition, l’pus tiot boution su l’guiffe d’ches présintateurs ! Cha n’révolutionn’te pon tin quotidien, mais cha fait plaiji d’vir qu’is doiv’tent s’faire du mouron pou ches mêmes cosses qu’ti !

In parlint d’mouron, i y in a deusse qui von’tent s’in faire. Mes gins, ch’est indiscutape ! Ches chiffes is n’mint’tent pon ! In théorie, pach’que j’in connos gramint d’autes, d’chiffes, qui sont arringés à l’sauche « pou n’pon affoler ches gins ». Mais cha, ch’est eune aute histoire ! Li, i n’mint pon. Quind Audimat i parl’te, cha donn’te des frissons à ches directeurs d’chaînes. Gramint, d’ailleurs à monsieur Toutin-Ferralle, pardon j’voulos dir’te Dacier. Pach’qu’in peut conch’tater qu’ch’est bin l’première fos, dins l’histoire d’el carette, qu’eune Audi mate alle cloue l’bec à eune Ferrari ! Allez, ch’est vinderdi, mes gins, ch’étot min ju d’miots cadieau ! D’el part d’Marie Toutoule !
In arvient à ches chiffes. Quind, in pus, ches frais généraux is grimp’tent à cosse d’ches déplach’mints. Y a, com’ qui dirot, d’el tenchion dins l’air. Pourtint, ches directeurs d’informachion is avotent tout fait pou qu’in voï’te du pays. Alors in a vu. In a vu que New York i déménageot du pays de Daboliou pou arrifer au pays de Barry. Mais ches esscuchions à New York, d’el Ferrari et d’sin concurrint direct Pujadas, alles s’sont soldées par un échec ! L’Ferrari alle a gardé ch’pole position mais d’eune courte longueur. Alle a fait sin pus mauviais score d’pis qu’is ont mis à l’artraite min Patrick ! Quint à David, qui ch’bat toudis conte sin Goliath d’TF1^er , i vient de s’faire griller par ches Marseillais !
Ne querque pon, mes gins… I n’y avot pon d’match de ch’t’OM sur eune aute chaîne. Ch’est pon, nin pus, eune nouvielle chaîne d’tévé locale, qu’in arcevrot à’ch’t’heure partout in France in TNT. Même chi cha n’a jamais été auchi essplosif… Nin ! Min David i ch’est fait coiffer à ch’potieau par cheule série d’el tros : « Pus bielle l’vie ! » aveuc chisse virgule chisse millions de tévéspectateurs ! Infin, quind j’dis qu’i ch’est fait coiffer à ch’potieau, j’ne parl’te pon de ch’misse in plis ; toudis auchi impeccape ! J’n’sais pon quo qu’i utilisse com’ laque, mes gins, mais ch’est du solite ! Ti, j’te vos derrière tin écran. T’es prêt à dir’te que cha arsimpe à ch’coiffure d’ches Playmobil. T’es vraimint un moqueux d’gins. Même mi, j’n’auros pon osé in parler…
Vingt dius ! Ch’est eune catastrophe cha ! In préfèr’te raviser eune série à rallonche plutôt que ch’t’évén’mint mondial’te ! I fot qu’in fache qué cosse pou sauver l’monte ! Infin, churtout nou’z’autes, in France ! I fot sauver ches vingt heures d’el Une et d’el Deusse. In va d’jà s’pincher, sins querre, su ches tites. L’journal d’ches vingt heures ! Cha n’est pus très vindeux. Chaque fos, ch’est pou parler d’el bourse qui quée. D’ches prix qui grimp’tent. Et d’ches boubourses qui no gouvern’tent et qui n’in fon’tent qu’à leux tiêtes ! Mi, à m’mote, ch’est l’miot journal qui fait peur’te. Alors j’proposse : « L’bielle vie d’ches vingt heures. » Ouais, j’sais bin, mes gins ! Cha ne s’ra pon des meilleux nouvielles pou autint. Mais, dins ch’feulleton, cha n’est pon tout rosse nin pus. Y a des complots, des déchir’mints, des magoulles et gramint d’carabistoulles. Bref, com’ dins l’vraie vie et cha n’impêque pon ches gins d’raviser. Ch’est parel à ches marques qu’alles mettent toudis qui sont numéro un. In appell’te cha un effet positif !
Alors, i n’faudra pon s’continter d’chinger ch’tite. I faudra invinter à un nouvieau conchept, tout in gardint ch’duel intre ches deusse journaleux. Mais in aura b’soin d’eune présinche forte pou qu’ches tévéspectateurs is so’tent com’ hypnotisés. Qu’is n’aient pus l’invie d’appuyer such’ boution tros !  In va faire appel à ch’sauveur d’l’humanité fraîqu’mint élu pou no filer un cop d’main. Hé bin, in a quind même gramint parlé d’li in France ! I peut bin consacrer un tiot peu d’sin timps pou sauver ches journiaux qui ont tint parlé d’li ! Pis, i est cor’ in vacinches jusqu’in janvier. Pou l’momint, l’anchien locataire i squatte l’baraque blinche, i n’peut même pon imménager. In peut imaginer que Barry i viendrot faire un tour su ch’Canebière. Ch’solel i tap’te fort, i fait soif. I rinte dins un bistro pou comminder un tiot jaune.
D’jà, t’as ch’cocache d’el situation. Un grind noir’te qui comminde un tiot jaune. Lal, i quée su Ferrari et Pujadas, chacun assis à eune tape défférinte. Et cha s’ingueul’te à cop d’mauviaisses nouvielles et d’augmintations. I fot bin pacher ches infos mine de rin ! Te sais, un peu à la Pagnol. D’timps in timps, ches infos s’rotent à peine d’el provocation pou l’autre. Dins l’Chud, in a querre à in faire gramint pus, churtout à Marseille. Pis, cha fait grimper l’Audimat ! Ferrari, in parlint d’Pujadas, pourrot glicher : « Fatche de con, in va d’voir l’supporter jusqu’à soichinte-disse ins, ch’ti lal, à cosse d’el date limite d’âche qui vient d’être augminter… » Pujadas in parlint d’Ferrari : « Peuchère ! Alle a eu eune augmintation d’tros chints pou chint par rapport à ch’viux. J’vais li crever ches pneus pou li pacher d’vint ! » Armarque au passache, mes gins, que Pujadas i ress’ toudis auchi comique in parlint d’augmintations d’tros chints pou chint et in comminchint par peuchère…

Et Barry dins ch’t’histoire ? Li, ch’est l’guess-star. I vient lal pach’qu’i a réussi à mobiliser pus d’gins qu’personne dins sin pays. I est fédérateur. In pourra li donner quéques répliques aveuc ses fans d’drote et d’gauche. Pisque, lal auchi, i avot réussi un essplot ! Is sont tertous contints. In va pouvoir immortalisser un bieau tableau. Ségo qui li tient l’main gauche. Nico qui li tient l’drote et in les f’ra canter tertous in chœur : « Donn’te-me t’main et prind l’mienne. Mais ouais, mais ouais, ch’crisse alle est finie ! » Ch’est vrai, mes gins. Pindint qu’in parlot d’li, in aeu  l’impréchion que ch’monte i arcomminchot à tourner dins l’bion sins. Alle étot vraimint pus bielle l’vie…