Chalut mes gins ! Bah, cha n’in finit pus ! In n’est pon cor’ à ches grintes vacinches, chinon j’auros pu dir’te que ch’est l’saga d’l’été. J’sais bin qu’in va cor’ et toudis parler d’el même cosse, mais ch’est nin d’em faute ! Cha continue dur’te dins ches excusses. Mi, j’n’arrête pon, nin pus, d’in faire. J’in ai même fait à min manicraque informatique, hier, pach’que j’l’ai traité d’echcargot. In tout cas, j’m’excusse auchi pach’que ches sujets vaqu’mint pus grafes is pach’tent complèt’mint inaperchus. Mes gins, j’m’excusse, mais j’cros bin que j’vais cor’ m’excusser…

J’m’excusse in premier pou ches gins d’ERDF. Ch’est vrai, mes gins, i faut les comprinte. Cha n’est pon fachile d’vife in pleine crisse quind in a un traval et qu’in est sûr’te d’el garder. I faut comprinte auchi qu’el préchion alle est terripe. In n’sait pon gramint d’timps à l’avinche quelle grèfe in va bin pouvoir faire pou inquiquiner ches politiques. Te peux m’croir’te chi te veux, mais ch’est l’idéal pou plomber tin moral. Te n’sais jamais quo qu’te dos écrir’te su tin calicot et te n’as pon gramint d’timps pou apprinte ches parodies pou défiler dins ches rues. J’m’excusse auchi pou ches factures qu’is archoiv’tent. T’as l’impréchion d’y laicher t’quemisse, tindis qu’eusses, ch’prix d’el feulle d’papier et de ch’t’inv’loppe is coûtent pus quers que ch’prix à payer. J’m’excusse cor’ pou tous ches agints qui ch’sont pris ches pids dins ches câbes. Cha a débrinché gramint d’prisses et ch’est pou cha qu’in a eu tint d’coupures sauvaches, ches derniers jours…
J’m’excusse à’ch’t’heure pou ch’présidint d’euch gasse qui vient de ch’octroyer eune augmintachion d’chint quate-vingts pou chint. Ch’est nin de ch’faute, mais l’vie alle est dur’te pou li-auchi. Ch’baraque alle est gramint grinte et alle n’est pon très isolée. Ch’femme alle a toudis frod et pou qu’i la fache Suez, i faut qu’i mette ch’thermostat gramint haut. Alors, aveuc ch’prix d’euch gasse, qui étot coinché à ch’cours l’pus haut d’euch pétrole, i fallot bin qu’i prenn’te eune déchision. Pis, j’m’excusse ch’i a attindu qu’ches grinds frods is finiss’tent pou diminuer ch’prix d’onsse pou chint, tindis qu’in a cauffé com’ des babaches, tell’mint qu’i f’sot frod. Ch’est nin de ch’faute ! Sin ministre d’tutelle avot ches dogts ingourdis et n’avot pon réuchi à chigner l’note d’cherviche avint ! J’m’excusse auchi chi in a déchidé d’el faire un premier avril, pou t’faire croir’te à eune blague alors qu’ch’est vrai. Cha a réell’mint baiché…
J’m’excusse toudis pou ch’comport’mint d’ches députés socialistes qui ont jué à muche-muche aveuc ches rideaux de ch’t’hémicycle. Ch’est com’ cha aveuc ches gamins. I faut toudis les churveiller et avoir l’oeul. Te t’rinds compte, ti’z’aute, in a failli avoir eune catastrophe. Ch’barre d’rideau alle aurot pu ch’décrocher. D’jà, i y in a un qui aurot pu l’archevoir su ch’tiête. Pis, imagine qu’alle s’rot quée trop tôt. Is aurotent été découverts et leu bionne blague alle aurot capoté ! J’m’excusse pou Christine Albanel qui n’a pon appréchié cheule bionne plaisint’rie qui étot dine d’euch meilleu comédie burlesque, qui n’a pon cor’ été téléchargée par ches pirates d’euch Net, alle !
J’m’excusse pou tous ches radars qui prenn’tent eune photo d’ti alors que te n’as pon eu l’timps de t’mette un cop d’peigne dins ches queveux. Du cop, su ch’photo, te n’es pon à tin avintache. Cha n’est pon eune raison pou qu’in n’t’invoie pon un souv’nir de cheule folle rinconte. T’auras même l’timps d’faire un point, voire pus chi affinité, su ch’fait que te n’as pon assez appuyé su ch’pédale d’frein, car t’étos in pleine déchinte. J’m’excusse auchi pou ches radars qui sont dins ches zones à risque. Lal d’ù qu’te peux rincontrer ches autes automobilistes chi te prinds l’timps d’faire un pique-nique à ch’bord d’el route. Cha partot d’un bion sintimint. In savot qu’te s’ros seu, su eune bielle line drote. Pou l’cop, in aurot l’timps d’faire une misse à ch’point pou qu’el photo alle n’sot pon floue. Pis, com’ t’es seu à pacher par lal, pon d’risque qu’in t’confonte aveuc quéqu’un d’aute ; ch’est ti l’vedette !
J’m’excusse pou WonderSégo qui ch’excusse pou min Nicolas. Donc, j’vais faire com’ in mathématique, cha s’ra pus simpe. J’vais appliquer cheule règue d’el trinsitivité. Cha veut dir’te que j’m’excusse direct’mint pou min Nicolas. Waouh ! Cheule règue alle m’poss’te un problème. Cha veut dir’te que j’sus dev’nue WonderSégo, puich’que j’fais des excusses pou min Nicolas. Vingt dius ! Bah, ch’est très timporaire alors ! Cha n’est pon min meilleu rôle, mais j’m’excusse d’avinche, j’vais l’assumer quéques minutes. Ex-cu-sse-le-mes-gins ! Ch’est nin de ch’faute ch’i parl’te trop vit’ et qu’i n’fait pon attinchion à ch’qu’i dit parfois. Ch’est d’em faute et j’m’in excusse. Ch’est à cosse d’mi. J’ai laiché ch’porte d’min frigidaire trop long ouverte et min Nicolas i a pris un cop d’frod. Ch’est pou cha qu’i est toudis in train d’armuer ches épaules. Ch’est pou ch’arcauffer ! Pis, cha li fait claquer des dints. D’autint qu’i les a longue. Alors, quind i dit quéque cosse, i y a des miots et des syllabes cinchurés. In n’comprind pon toudis l’chins exact de ch’qu’i a voulu dir’te…
Cha y est ! J’viens d’artirer min boubou et d’artreuver mes queveux blonds. J’sus d’nouvieau Marie Toutoule pou m’excusser auprès d’ches deusse attachées parlemintaires à WonderSégo. Ch’est nin de ch’faute chi alle a oublié d’payer ches s’maines d’traval. A’ch’t’heure, alle est condamnée par l’justiche à les indemniser. Cor’ eune fos, pardon pou alle. D’pis qu’Titine d’Lille tient ches comptes, WonderSégo alle a été chouligné in rosse. In li a coupé eune bionne partie d’ches frais profechionnels et alle n’a pus gramint d’pépettes. J’m’excusse, ches files, mais ch’est juss’ eune étourd’rie d’euch part. Alle croyot à d’euch bénévolat pou ch’cosse…

Mes gins, tout cha m’a donné l’invie d’faire eune tiote parodie. Ouais, cor’ eune ! Bah, in dit toudis que ch’musique alle adouchit ches mœurs… Heureuss’mint, pach’que, même chi in in rigol’te, ch’est gramint grafe d’ête arrifé à eune chituachion com’ cha ! Tout cha, ch’est des bêtisses. Et d’bêtisses in excusses, i n’in fallot pon pus pou que j’armette su ch’platine eune canchon d’Sabine Paturel…

Che spécialiste in chocolat

Li qui roupille aveuc Carla

Quind i parl’te, ch’est toute eune cata

J’sus obligée d’pacher par là

Mais com’ je sus WonderSégo

Qu’est pus d’un tour dins min frigo

J’deviens la reine de l’à propos

Pou mette l’dogt su ches vilains miots

Fallot bin quéqu’un ch’y colle

I ch’in fout de ch’protocole 

Du cop j’fais que des excusses

Des excusses à cosse de li

Fallot bin quéqu’un ch’y colle

I ch’in fout de ch’protocole 

Du cop j’fais que des excusses

Des excusses à cosse de li

Pus i parl’te et pus i in sort

Du cop, j’arbondis com’ un r’ssort

J’prinds peut-ête la parole à tort

Ch’est vrai, je li in veux à mort

Tout est prétexte pou l’immerder

Et pou li faire un grind pid d’nez

Je sus bin prête à continuer

Tint qu’i chera à l’Elysée

Fallot bin quéqu’un ch’y colle

I ch’in fout de ch’protocole 

Du cop j’fais que des excusses

Des excusses à cosse de li

De l’Afrique et même de France

In parl’te de mi, ch’est eune chance

j’fais ma pub à cop d’excusses

et d’excusses, ch’est grâche à li

Rajoute-in min Nicolas

J’adore mette ches pids dins l’plat

J’in ai cor’ bin mille excusses

Mille excusses pou tes blabla

Fallot pon me batte tu vos…