Chalut mes gins ! J’espèr’te que t’as bin profité d’euch ouiquen pach’qu’in pourra dir’te, à’ch’t’heure, qu’in a eu un bieau printimps. Ch’est pou rir’te, bin sûr’te ! Quoque… Bref, in n’est pon ichi pou parler d’euch timps mais chi t’as fait bronzette dins tin gardin, t’as chertain’mint loupé eune informachion capitale pou t’vie. Chéanche d’rattrapache…

J’sus pachée à côté d’eune nouvielle la s’maine dernière. J’viens d’découfrir que ch’étot la s’maine d’el lingue françaisse du seisse à ch’vingt-tros. J’n’sais pon pou ti, mais autint quind ch’est la s’maine d’euch goût, in in intind parler. Autint ichi, j’n’in ai pon l’chouv’nir ! I n’est jamais trop tard pou in parler. I faut croir’te qu’in est pus préoccupé par ch’qu’in met dins ch’bouque que par ch’qui in sort. Nin ! Cha n’est pon l’peine d’em pacher t’lingue, ti’z’aute ! J’voulos parler d’ches miots. Ch’est malin ! A’ch’t’heure, cha m’fait pinser à un truc. J’auros pu faire eune bionne lingue, diminche. In acatant d’el viante d’not’ bieau pays, mi auchi, j’auros défindu l’lingue françaisse. Marie Toutoule, t’es in train d’t’égarer, cha n’est pon d’cuissine que te voulos parler, mais bin d’el bielle lingue françaisse quère à Molière…
In in parl’te just’mint d’Molière. Ch’i étot cor’ ichi, i aurot eu tous ches queveux qui ch’drèch’tent su ch’tiête. Pis, chi te t’chouviens d’commint is étotent coiffés à ch’t’époque, même Derireless à côté alle aurot arsimpé à eune gratounette pou faire ch’vaichelle. Toudis i est qu’ches purich’tes d’el grammaire et ches amoureux d’bielles lettes is ont déclaré avoir été mis à l’torture, par ches écarts d’lingache d’min Nicolas. Quo qu’ch’est cor’ qu’cha ? Est-ch’ qu’in dot aller quercher min duo favori Paul et Mick pou mette deusse pièches dins l’manicraque ? Attinds, mes gins ! In va arv’nir su ches déclarachions pou ch’faire eune idée…
Mardi disse-chept, i dit dins sin dichcours d’vint ches ouvreux d’Alstom, à propos d’euch bouclier fich’cal :  « Si y en a que ça les démange d’augmenter les impôts… » Ch’est un sujet qui fâch’te. Te peux même chinger ch’verpe in rimplachint par gratoull’te, te verras qu’ch’est toudis auchi désagréape d’parler d’augmintachion d’impôts. Est-ch’ que cha les déminge ou cha les gratoull’te ? Quo ? Cha n’est pon cha qui a fait un télescopache syntaxique. Bion, d’accord, ch’est vrai qu’cha fait un peu brouillon. Mais cha dot ête su l’cop de ch’t’émochion. J’voudros bin t’y vir, ti, d’vint tous ches gins. Parler chins même avoir prompteur ou des notes d’vint ti !
Pus tard, à propos d’ches étutes d’ches élites : « On se demande c’est à quoi ça leur a servi ? » J’n’ai pon chingé eune lette, mes gins. Lal, cha comminche à faire gramint ! In peut ch’posser l’quech’tion. Li, un inchien avocat, ch’est à quo cha li a servi d’faire des étutes ? Vingt dius ! Ch’est contagieux. V’là que j’n’sais pus commint qu’i faut dir’te ! Forchémint, in ch’doute bin qu’in n’li pache rin ! Chi in ravise d’pus près, l’treisse à Rambouillet, i disot : « On commence par les infirmières parce qu’ils sont les plus nombreux. » Bion, ch’est vrai, d’loin, is ch’arsimpent tous aveuc ches blousses blinches. In d’vrot mette ches infirmières in rosse et ches infirmiers in bleu. J’sus sûr’te qu’in aurot évité ches fautes d’accord.
Cor’ un pou l’route, l’vingt jinvier à Provins : « J’écoute, mais je tiens pas compte ! » Bah, ch’est l’ne qui est rechté coinché. D’après ches linguistes, i paraîtrot qu’eul fait de n’pon marquer ch’négachion, cha établit eune connivinche. J’acoute, mais j’n’tiens pon compte, aveuc che ne, cha veut donc dir’te : Causse toudis, te m’intérèches. Ou cor’ : Parl’te à min chul, m’tiête alle est malate. Donc, quind in n’met pon ch’ne, cha veut dir’te que lorch’que j’acoute, j’acoute et j’n’fais pon ches comptes in même timps. J’sus chint pou chint récheptif. Te vos, cha ching’te tout ! In a bin établi eune connivinche. Ches syndicats is n’ont rin compris. Is devrotent artourner à ch’t’école…
Ches linguistes is ont auchi armarqué que ch’étot in général d’vint ches ouvreux qu’i ch’lâchot. In peut dir’te que, pou leu s’maine, is ont mis ches bouquées doubes. Alors, mes gins, est-ch’ que ch’est eune stratégie pou faire peuple ? Quind in est in costard cravate, à m’mote, cha n’el fait pon ! I ch’harnaiqu’rot en bleu d’traval, j’auros bin cru à cheule echplicachion. Est-ch’ que min Nicolas is est bilingue ? Carlita alle a dû li offrir eune méthote hors d’prix. Pardon, j’voulos dir’te à chix mille. Alle a dû li dir’te : « Min amoureux, i faut qu’te parl’tes com’ ches gins à’ch’t’heure. Ch’est pou cha que t’cote d’popularité alle baiche autint que ch’courbe d’el bourche. J’t’ai acaté Binlieue / Neuilly – Neuilly / Binlieue » Alors, li, croyant bin faire, i in fait des tonnes. Pach’que, vu sin imploi d’euch timps, i in est toudis à ch’première lechon. I improvisse donc. In a quind même eu caud. In effet, i aurot pu faire appel à un coach. Pis, i y in a un just’mint lipe su l’marché. Ch’est min Dominique.

Mes gins, t’imagines, ti, cha méthote d’improvisachion et ches conseils télévangélistes eud l’aute ch’que cha pourrot donner. D’jà qu’i armue gramint ches bras : « Yo ches meufs et yo ches men d’France ! Tra-va-iller pus pou ga-gner pus ! » J’te fais eune verchion courte pach’qu’in mettant syllabe par syllabe, cha s’rot du vingt-quate su vingt-quate qu’in l’verrot à ch’tévé ! Mi, j’in s’ros cor’ à ch’premier paragraphe d’main ! A côté d’li, ches dichcours à Fidèle is pach’rotent pou un messache publichitaire. In tout cas, cha n’aurot chertain’mint pon plu d’avintache à Molière. Quoqu’i ait quind même pu écrir’te Tartuffe et j’em d’minde bin pouquo…