Chalut mes gins ! In va continuer dins eune série dont in a l’secret in France. Cheule des réformes qui sont prévues et des démintis qu’in s’impréche auchitôt d’dire à l’presse. D’deusse cosses l’eune, soit, ch’est vraimint ches journalistes qui invintent ches réformes pou titiler nos élus. Lal, in peut leu tirer not’ capieau pou avoir gramint d’idées. Soit, cor’ eune fos, in met l’charrue avint ches vaques.

T’es in train d’te dire que Marie Toutoule alle s’est gourée, in dit l’charrue avint ches bœufs. Ouais, j’connos, com’ ti, cheule eschpression. J’avos juss’ invie d’faire un plaiji à min enquêtriche préférée, Bridget Columbo, qui préfère ches vaques aux bœufs ! In vient à ch’sujet du jour. I fot qu’in treuve un nouvieau nom de série. In a d’jà vu insimpe deusse saisons de « Plus taxe la vie ». Ichi, pou eune fos, ch’est pon d’taxes qu’in va parler. Alors, j’te proposse : « L’boîte à rumeurs » Ch’est com’ eune boîte à meuh. In acoute eune vaque braire et ch’est l’cacophonie partout !
Alors, te m’diras, chi quo qui no intéresse i a été déminti, cha n’vaut p’t’ête pon l’cop qu’in in parl’te. Mais chi, mes gins, car même chi in l’a déminti à’ch’t’heure, te peux ête sûr’te qu’in va te l’arservir dins quinsse jours ! Ch’est au sujet d’el reforme du permis d’conduire. In n’sait pon ch’qu’is no réserv’tent pou no, ches viux conducteurs. Mais in no donne un aperchu d’quo qui pind au nez d’ches jonnes qui von’tent l’pacher ou qui vienn’tent de l’avoir.
Je n’mets pon in cosse l’fait qu’i y a gramint d’jonnes qui fon’tent l’cacou au volint d’leu carette. Qui oublient qu’in a auchi invinté l’ieau minérale quind is sor’tent et qu’ches portapes is n’sont pon greffés à leux orelles ! Nin, j’sus d’accord pou qu’in treuve des moyens pou impêquer ches morts su ches routes. Chez tous les conducteurs d’ailleurs. Mais i y a deusse trucs qui m’ont fait rigoler quind j’ai lu quo qu’in voulot faire. In premier, in veut impêcher un jonne d’conduir’te des carettes aud’sus d’eune chertaine puissance. Quo qu’ch’est eune chertaine puissance ? Mi, j’in sais rin. A m’mote, i va y avoir un problème aveuc tous ches gamins qui impruntent l’carette à papa pou draguer ches files. Auchi, quo qui va s’pacher dins ches binlieues ? Lal d’ù qu’in vot gramint d’grosses carettes allemindes aveuc des jonnes au volint. In va aller leu confisquer ches clés in leu disant : Te n’as pon l’drot à cha, min tiot père, alle est trop grosse pou ti. Te peux faire tourner l’volint pou faire simblint ! Chi t’es un bion garchon, in t’autoris’ra à faire tut-tut aveuc ch’klaxon ! Commint qu’in va faire ? Mette un surveillint devint chaque carette stationnée et d’minder l’permis d’conduire quind quéqu’un i voudra la printe.
Bon, in va laicher nos élus aveuc ch’problème. In va vir insimpe l’deussième truc qui est cor’ pus drôl’te. I fot que j’t’el disse, mes gins, j’ai auchitôt pinsé à un remèque d’eune histoire. In l’a tous lu in étant tiot ou même vu l’déchin animé qu’in in a fait. In voudrot imposer un coufre-fu à ches jonnes. Infin, in peut vir cha com’ cha. In voudrot les interdire d’conduire à partir d’eune chertaine heure. Alors, te n’vos pon d’quo j’veux parler. In va chituer l’scène tard l’soir. Un jonne i est in train d’dinser par eximpe. Ch’est l’fiête, mais li, i ravise toudis ch’monte. In pus du gilet jaune fluo et de ch’triange, cha s’ra s’meilleu amie. I n’veut pon louper l’momint du départ pou n’pon rintrer à pid. A minuit, par eximpe, i y a un tout nouvieau gadget électronique qui impêqu’ra l’carette de démarrer.

Mi, cha m’a auchitôt fait pinser à Chindrillon. L’carette alle n’s’trinsforme pon in citroulle. Nin, i n’fot quind même pon croir’te à ches contes de fée. Com’ in n’arrête pon l’technologie. In peut supposer qu’el jonne i est parti avint l’heure fatidique. I est cor’ in train d’conduire pach’qu’i n’est pon arrifé à ch’baraque. I n’a pon bin évalué l’timps qui li fallot pou rintrer. Alors, l’système Chindrillon i alleume ches feux d’panique pou prév’nir ches gins derrière li. Eune vox synthétique alle li dit : « Min gamin, t’es in train d’faire eune grosse bêtisse ! Te n’as pon l’drot d’conduir’te à ch’t’heure-lal. I t’ress’ eune minute trinte avint que ch’moteur i s’arrête. Te dos t’garer d’urgince. L’système Chindrillon i t’armerchie d’sortir aveuc tin gilet jaune pou mette tin triange à chinquinte mètes d’el carette. In pus, in a prévu pou ti, eune doudoune pou l’ress’ d’el nuit. Com’ cha t’auras bin caud ! Merchi d’avoir fait confianche à Chindrillon…