Chalut mes gins ! Cha fait du bin d’ête in ouiquen aveuc ti ! J’espère qu’te n’as pon prévu eune séinche d’bronzache pach’que cha voudrot dir’te que te n’as pon vu qu’in a éteint ch’solel. Sauf, chi te m’lis d’un pays lointain. Dins ch’cas, pinse à mi, invoies-me in eune dosse. In attendint, j’vais d’voir faire com’ toudis, parler d’qué cosse d’drôl’te pou que ch’solel i brill’te virtuell’mint…

Alors, quind in veut plaisinter un bion cop, ch’est simpe : In parl’te d’politique. Cha fait gramint rir’te mais toudis à nos dépins. Pis, in a l’occasion d’in rir’te très chouvint insimpe. A m’mote, ch’est pon près d’s’arrêter. In peut parler d’un pipole qui fait des chiennes. Cha auchi, ch’est facile. I y in a qui s’imagin’te que, pach’qu’is sont connus, is peuv’tent faire quo qu’is veul’tent. Mais à’ch’t’heure, pou rigoler, j’sus allé vir chez ches Inglais. Pus préchisémint d’un cas d’divorche inglais. J’in vos d’jà qui s’dis’tent : Marie Toutoule, ch’est nin bin de ch’moquer d’gins qui divorch’tent. Ch’est un sujet graf’… Ch’est vrai, mes gins, mais quind cha tient d’el bêtisse, mi, cha m’fait rir’te !
T’as chertain’mint intindu parler que, such’ Net, in peut avoir eune vie virtuelle. Ch’est un monte qui s’appell’te Second Life. Te fais évoluer un personnache qui t’arsimpe. In appell’te cha un avatar. L’seu différinche aveuc l’vraie vie, ch’est qu’te peux faire quo qu’te veux. Par eximpe : Mi, j’pourros être eune Top Model connu dins l’monte intier. Alors que dins l’vraie vie, j’n’sus qu’eune vedette dins min quartier. Un homme, qui s’rot putôt coinché aveuc ches femmes, i pourrot ête un Don Juan. Bref, ch’est un manicraque à rêfes. Quind t’éteins ch’bidule, tout i ard’vient com’ avint ! Sauf pou Amy et David. Ches deusse-lal is s’sont trop pris au ju et cha leu a déboulonné des pièches dins l’cervieau.
A début, ch’étot l’rêf’. Is s’sont rincontrés dins ch’monte virtuel. L’mayonnaisse alle est montée intre eux jusqu’à ch’qu’is s’déchid’tent à s’rincontrer dins l’vraie vie. Idyllique, ch’est bieau l’amour, is n’tard’tent pon à ch’marier pou d’bion. Seul’mint, quind t’es accroc à t’vie virtuelle, pach’que ch’est pus bieau, te n’peux pon t’arrêter ainchi ! Amy et David is ont continué à juer jusqu’à ch’jour où l’avatar d’David i est allé vir eune prostituée et eune bielle jonne file virtuelle. Dins l’vraie vie, in pache ainchi d’idyllique à cauch’mardesque. Amy alle li fait des crisses d’jaloussie pach’qu’alle l’soupchonne d’arproduire ch’vraie vie. Et ch’est lal qu’in va jusqu’à ch’divorche mais pon virtuel, li. L’avatar infidèl’te a créé l’avarie dins ch’batau d’l’amour et leu mariache i a pris l’ieau…
Pourtint, mes gins, qu’ech qu’in est bin dins l’Second Life. In oufre ches zis l’matin à cosse d’un rayon d’solel venu taquiner ches paupières. Ah, quelle bielle journée cor’ ! Ch’est eune timpérature idéale, com’ tous ches jours. I fait toudis bieau mais pon trop caud. L’drache alle quée toutes ches nuits pou arroser ch’végétation mais jamais l’jour. In alleum’te ch’tévé et in apprind que ches artraites alles vienn’tent cor’d’augminter. Que ch’salaire minimum i est arrondi à tros milles euros pou qu’cha sot pus fachile à compter. Que ch’PIB i grimpe dins tous ches pays pach’qu’in fabrique uniqu’mint ch’qu’in sait faire chacun et qu’in l’vind à tertous. Sins essayer d’aller fabriquer ailleurs. De toute fachon, cha n’ser’te à rin, ches gins du monte intier is ont ches mêmes conditions d’traval ! Qu’in vient d’treuver du pétrole su Mars et ches navettes alles sont trinsformées in pétroliers. Mais ch’est un nouvieau pétrole qui n’pollu’te pon. In vient d’terminer ch’dernier conflit car i a été déchidé, dins tous ches pays, d’supprimer ches religions…
Mes gins, in est vraimint bin. L’vie politique alle est idéale. In annonche à’ch’t’heure l’mariache d’Ségolène et d’Nicolas. Après des années à s’invoyer des tiotes phrasses assassines et après avoir été l’un et l’aute éconduits par leux conjoints. Ch’est l’amour aveuc un grind A qui réunit ches deusse-lal…Millard, m’manicraque i vient d’bugger ; tout i s’est plinté ! J’me disos auchi. D’el scienche fiction  dins l’virtuel, cha n’pouvot v’nir que d’un virus informatique! Marie Toutoule, tes neurones von’tent s’immêlés ches pinceaux chi te continues à rêfer dins Second Life ! Chertaines cosses s’ront toudis virtuels, tu peux me croire…