Culture MT

Culture MT

précédent 1 2 3 4 5 6 7 8 9 suivant fin

Mardi 20 janvier 2009 2 20 /01 /Jan /2009 10:53

J'ai fait un rêfe – J'ai fait un rêve – I have a dream

Chalut mes gins ! Eune fos i n’est pon coutume. In va fait historique à’ch’t’heure. Bin, ch’est pon l’tout d’rigoler, mais i faut auchi qu’in fache marcher cheule boîte à neurone d’timps in timps. Alors, ch’est un jour très particulier, cha fait vraimint long que ch’monte intier i n’ravisot pon dins l’même direction : Ches Etats Unis d’Amérique. In va profiter d’arlir’te insimpe cheule partie du discours que Martin Luther King i a fait su ches marches du Lincoln Memorial à Washington DC, che 28 août 1963…

«…/ J’te l’dis à’ch’t’heure, mes amis, bin qu’in dot faire fache à ches difficultés d’à’ch’t’heure et de d’mai, j’ai tout d’même fait un rêfe. Ch’est un rêfe profondémint inrachiné dins l’rêfe américain. »
J’fais ch’rêfe qu’un jour, cheule nachion ch’lève et vife chous l’véritape sins de sin credo : « In considér’te ches vérités com’ évidintes, que tous ches hommes ont été créés égaux. »
J’fais ch’rêfe qu’un jour, su ches collines rouches d’el Georgie, ches fils d’ches esclafes et ches fils d’ches propriétaires d’esclafes puichent s’assir insimpe à l’tape d’el fraternité.
J’fais ch’rêfe qu’un jour, même l’Etat du Mississippi, désert étoufint d’injustiche et d’oppréchion, sot trinsformé in eune oasis d’liberté et d’justiche.
J’fais ch’rêfe que mes qute jonnes infints vivront un jour dins eune nachion d’ù qu’is n’s’ront pon jugés pour l’couleur d’leu pieau, mais pou l’cont’nu d’leu perchonne. J’fais ch’rêfe à’ch’t’heure !
J’fais ch’rêfe qu’un jour juss’ là-bas in Alabama, aveuc ches rachistes vichieux, aveuc sin gouverneur qui a ches lèfres dégoulinintes des miots interposichion et annulachion ; un jour juss’ là-bas in Alabama ches tiots garchons noir’tes et ches tiotes files noir’tes puichent jointe leux mains aveuc ches tiots garchons blincs et ches tiotes files blinches, com’ frères et sœurs.
J’fais ch’rêfe à’ch’t’heure /… »

Alors, ch’est sûr’te, mes gins, ch’discours i a été fait pou ches Américains. Mais chi in réfléchit un peu pus loin et qu’in ching’te ches lieux et ches latitutes, ch’est eune ode à l’paix et à l’tolérinche intre tertous. Cha ress’ auchi dins l’actualité, même chi cha a été écrit i y a pus d’quarinte-chinq ins. I suffit d’raviser ch’qu’in vot dins ch’monte pou in ête convaincu. Ch’est auchi l’jour d’ù Daboliou i va armette ches clés. I a infin fini d’préparer ches valisses. Pourtint, i n’avot pon à ch’occuper d’ches meubes. Nin ! Ch’mason blinche, ch’est com’ qui dirot un meublé. T’as l’locachion pou quate ins, renouv’lape eune fos seul’mint. Cha, l’liste d’ches cindidats pou y habiter alle est longue, i faut bin laicher eune chince à ches autes.
Obama, li, i vient d’régler ch’note d’hôtel, infin ches contribuabes américains, et i pourra infin ch’installer à ch’Barack ! I va avoir gramint d’pain su l’planque. D’autint qu’i vient d’faire ches comptes et qu’i n’ress’ pon gramint d’billets verts dins ches caiches. Aveuc tous ches traders qui ont fait des cocotes in papier ! Mes gins, j’pinse à un truc tout biête : J’espère au moins que Daboliou i aura laiché d’quo minger dins ch’frigo d’el mason blinche, pach’qu’in dit toudis qu’in travalle moins bin aveuc ch’vinte creux !

In chouhaite eune bielle réuchite à Obama qui dot cacher l’Barack ! Même chi, ti com’ mi, in n’est pon dupe, mes gins. In sait bin que, même chi in vot l’couleur d’l’echpoir pacher du vert à ch’café au lait, cha n’va pon ête fachile d’mette du bion sins chez ches babaches, pou ress’ter polie. Cha n’s’ra pon fachile auchi d’arlancher ch’machine qui ch’est détraqué d’pis des mos. Tout ch’qu’in peut dir’te ch’est qu’chaque tiot pas fait conte l’bêtisse humaine, ch’est un grind pas pou ch’t’humanité…