Chalut mes gins ! J’sais pon chi t’es com’ mi, mais j’ai querre à bin minger. Et quind te sors aveuc ches amis, i y a un momint, d’ù qu’i fot nourrir tous ches gins. Surtout, quind t’as fait du léque-vitrines pindant des heures d’long. Alors, forcémint, i y a l’estomac d’tertous qui comminche à tirer l’signal d’alarme. T’es obligé d’faire eune réunion d’crisse d’urgince pou savoir quo in va faire et d’ù qu’in va minger ! Et là, chi t’y réfléchis bin, i fot toudis qu’i y in ait un qui t’proposse d’aller au Fass Foude. Ch’est pon original, mais cha permet d’faire com’ tous ches jonnes. I fot que j’t’disse, mes gins, j’n’ai pon souvint mis ches pids dins un endrot parel. J’arrife toudis à faire qu’in alle minger dins un tiot bistrot, mais lal, i fallot bin j’accepte, j’avos la majorité absolue conte mi !

J’n’avos pon l’sintimint d’ête eune vielle, à trente-chinq printimps, mais in pouchant l’porte du Fass Foude, ch’étot à chaque fos com’ chi, d’un cop, tous ches gins is avotent rajonni et qu’j’étos dev’nue leu taïonne. Quind te rintres lad’dins, te arpères toud’suite ches gins qui sont ches imployés. Is sont tous harnaiqués aveuc ches mêmes fouffes. A croir’te qu’is y on’tent eu un lot in promo dins  ches magasins. Te peux auchi noter qu’in n’vient pon t’vir pou t’demander à combien te viens ni d’ù qu’te veux t’assir. Et chi vraimint te viens pou minger, et qu’te n’as pon paché l’porte par hasard, i fot qu’te t’débroulles tout seu. Ch’est com’ à l’Sécu, i y a eune queue et, dins l’fond, un grind guichet d’ù qu’on acoute quo te veux ! I fot auchi qu’j’te disse qu’i n’y a pon d’carte pou choisir quo te veux minger. Te arlèfes l’tiête, et ches plats is sont mis in photo aud’chus du guichet. Mais t’existe pon trop vit’ quind te vos l’taille d’ch’plat car ch’est in poster. Et quind te l’as su tin platieau, ch’est eune aute histoire. Un peu com’ chi te ravisos du mauvais côté d’ches jumelles.
J’sais pon chi ch’est toudis ainchi, mais t’as l’timps d’raviser tous ches plats d’drote à goche et goche à drote eune pair’ d’fos. Tout i s’arsimpe un peu aveuc des noms pon parels. T’as gramint d’noms in inglais. Et chi te t’souviens d’ches cours, à l’école, quind te n’étos pon in train d’raviser par l’feniêtre, t’as l’imprechion d’ête qué à mon château d’l’reine Elisabeth Deusse. In t’parle de Royal, de Royal Deluxe. Lal, te t’dis : « Millard, min carte bleue alle va in prindre un cop ! » Mais auchi, chi te ravises eune aute photo, te qués in plein Top Chinquante aveuc des Bests of, des Maxis Bests of , cha dot ête ches mêmes mais cor’ miux, ch’est des maxis. L’queue alle diminue et te n’as pon l’timps d’t’attarder trop long. I fot auchi qu’te ravises l’ress pou faire tin chox et qu’te t’inities à un nouvieau parlache qu’in utilisse juss’ dins ches Fass Foude.
I y a pus qu’à s’jeter à l’ieau et d’apprindre à arconnaîte ches drôl’tes d’trucs. L’pus simpe, ch’est ch’ti qu’tertous i connot, qu’in vot dins ches films à la tévé et qu’in appel’te le inbourguère. Ch’est un sandouiche rond aveuc un bifstèque haché et d’eul sauce. Pis, rin qu’pou t’donner bionne conscience, in a mis eune feulle d’salate et eune trinche d’tomate. Ainchi, in peut dire qu’te minges équilibré, ch’est à l’mote à’ch’t’heure. Te peux  auchi opter pou des neuguettes. Ch’est des drôl’tes de tiots beignets aveuc des formes différintes. D’ailleurs, pou tout expliquer, ch’est un peu com’ ches fricadelles, te n’sais pon quo qu’i y a d’dins. Même chi in t’dit qu’ch’est du poulet, te n’in artreuves pon l’goût. De toute façon, l’goût, te t’in fous bin, car te trimpes ches machins dins eune tonne d’quét’cheupe ! Pis, mes gins, i y a un truc qu’in peut pon louper, ch’est com’ dins l’Nord, ch’est ches frites. Ch’est sûr, alles n’sont pon parèles. Même chi te prinds eune grinde portion, in a l’imprechion qu’in t’a donné un échantillon. Alors, te t’dis, qu’chi te les treuves bionnes, t’auras l’ress, mais nin ! Y a pon d’rape ! Cha n’vaut pon ches cornets d’ches baraques dins nos pat’lins, mais ch’est des frites !
Dins ces chox, in a auchi pinsé à ches végétariens qui ne ming’tent pas d’viande. Ches gins du Fass Foude is ont prévu un inbourguère aveuc du pichon. Infin, in dit fiche et pon pichon, ch’est pus brinché quind in dit l’même cosse in inglais ! Et pou terminer l’tour des sandouiches, is ont auchi déguisé un croque-monsieur in inbourguère. Ches Américains, is aim’tent bin faire croir’te qu’is ont tout invinté. Mais chi m’mémoire alle est bionne, le Croque-monsieur ch’est français ! In a servi ches premiers à Paris, dins un café boulevard des Capucines in 1910. Infin, ch’est vrai qu’in a jamais pinsé faire des croques ronds, nou’z’autes. Et à ches gins du Fass Foude, j’veux bin qu’is copi’tent min Croc’Toutoule aveuc du Maroilles. In pourra s’arringer pou ches royalties…
Ch’est pas tout cha, mais i fot bin boire ! Et bin just’mint, mes gins, i y a auchi pou l’boisson qu’ch’est étranche. Surtout quind te commindes un soda. In t’donne un grind gob’let d’ù qu’i y a autint d’glachons que d’soda ! A m’mote, is ont eu un prix d’gros su l’banquisse qui fond, à cosse de ch’réchauff’mint climatique et is n’sav’tent pu quo in faire d’tout cheule glache. Alors, is t’en font profiter avint qu’i y ait des grindes marées partout. Mais mi, j’sus nin née d’el dernière drache. Quind t’as chinquante cintilites d’liquide et qu’te mets ches glachons à l’pelle, tin liquide i débord’te ! Ch’est pon l’principe d’Archimède mais l’logique d’Marie Toutoule. Alors, commint qu’in fait pou qu’cha n’débord’te pon ? Eh bin, in met moins d’liquide ! Et chi in t’met moins d’liquide et qu’tin gob’let i est toudis auchi plein, cha veut dire qu’in t’fait payer ches glachons au prix de ch’soda. Ch’est mathématique ! Tiens ! In parlant d’banquisse, cha m’rappel’te que min Nicolas i a oublié ch’détal quind i voulot couler l’Titanic pour faire plaiji à Dany!

Infin, aveuc tout cha, v’là min tour qui vient. L’gus, derrière sin guichet, i m’deminde quo qu’j’veux in disant madame. J’allos pon li dire qu’ch’étot mad’moiselle. Quoque vu s’guiffe, j’auros p’t’ête dû car i étot bin mignon. Mais j’n’étos nin ichi pou l’bagatelle et min estomac i n’in pouvot pus attintre. J’li commindos alors quo qu’j’voulos et, com’ j’n’aime pon ches surprisses, j’restos su un inbourguère aveuc eune grinde frite et un maxi soda. Com’ cha, cha faisot vraimint américain. Juss’ eune parinthésse, j’n’allos pon prindre l’menu aveuc l’juet, i aurot treuvé cha bizarre à m’âche !
Caud d’vint ! Caud d’vint ! In t’donne tin platieau et lal, te fais moins l’malin. A’ch’t’heure, l’ju, ch’est d’n’pon l’rinverser, pacher autour d’ches gins sins qu’in t’bouscule et treuver infin eune plache d’ù qu’te peux t’assir pou minger !

V’là, mes gins, tertous i est à tape. A’ch’t’heure, i fot pratiquer un aute sport : Ouvrir in grind s’bouque pou minger l’inbourguère. Et lal, te peux organiser un aute ju : Ch’ti qui perd, ch’est ch’ti qui laiche échapper sin rondelle d’bifstèque. Ben ouais, passque ch’qu’i y a pus amusant dins ch’sandouiche, ch’est aveuc d’el sauce d’un coté et eune rondelle d’tomate d’l’aute, tin morcieau d’viande i a tindance à glisser tout seu. L’bœuf i est cor’ vivant et i n’a pon invie d’s’laicher faire com’ cha ! D’ailleurs, ch’est p’t’ête pon un bœuf mais un taureau et cha t’annonche eune bielle corrida !
Alors, te t’dis, passque t’boîte à neurones alle n’est pon optionnelle et qu’te sais t’in servir, qu’pou qu’alle ress in plache, la rondelle d’viande, i fot appuyer pus su l’sandouiche. Erreur, mes gins ! Chi t’appuies pus, ch’est l’sauce qui s’barre toute seu. Et chi t’appuies vraimint fort, d’un cop, j’n’préfère pon ête à tes côtés ! Te v’là artiste-peinte : L’Picasso des décoll’tés ! Période rouche, chi ch’est d’el quét’cheupe… Te peux auchi pou cheuls qui sont pus littéraires, déclamer tin désarroi d’vint ch’carnache : Ô inbourguère ! Ô désespoir d’min porte-monnaie ! A’ch’t’heure, ch’est l’bonheur pou min teinturier, min ch’misier i est tout crotté !
Et infin, pou cheuls qui sont psychologues, in peut s’poser des questions pou savoir quo qu’in vot dins ches taches d’sauce. Armonter à tin tiote infance pou savoir commint cha s’fait qu’t’es chi abrandoule ! Et pis, passque j’en vos qui, in lisant cha, is s’dis’tent : Marie Toutoule alle oublie ches matheux et physichiens. Alors, i fot que j’rajoute auchi : toute force exerchée in tenalle, d’bas in haut, su un inbourguère aveuc eune préchion, qu’in ne maîtrisse pon, développe un rejet latéral dont l’vitesse est proportionnelle à la force in tenalle exerchée ! Chi t’as rin compris, t’as qu’à essayer, te verras qu’cha marche à tous ches cops !

V’là, mes gins, j’avos mis du carburint dins min moteur. J’en auros bin pris un deussième pou l’route ! Te vos, ch’est toute eune avinture d’nourrir l’biête dins un indrot parel. Mais j’te conseil’te d’vifre cheul expérïnche. Chi te crains ches taches, te peux toudis y aller aveuc tin ciré d’pêqueux ! Et pou conclure, j’n’résiste pon à t’donner eune morale à ch’t’histoire : N’oublie pon, mingeux d’inbourguère qu’i t’fot avoir deusse qualités. Ouvrir grind t’guiffe et garder eune poignée d’fer dins un gant d’v’lours. Cha s’ra p’t’ête pon tes débuts d’grind dirigeant mais, in attindant, tin estomac i s’ra contint !