Chalut mes gins ! Alors commint cha s’est paché pou ti ch’ouiquen ? J’espère que te n’d’vos pon printe ch’t’avion, pach’qu’i valot miux qu’te l’pilotes ti-même ! Et cheule s’maine, te vas pouvoir t’exercher à ches métiers d’cheminot, d’facteur et d’prof ! Ch’est cor’ un grind mouv’mint d’grogne. Cha, in n’a pon cor’ assez plombé ch’pays aveuc l’crisse…

I fot auchi qu’in vienn’te au ch’cours d’ches amis du PS ! In n’peut pon dir’te que l’capitale d’ches bulles, Reims, cha a aidé gramint. Infin, is ont pu s’armonter ch’moral aveuc eune coupette. Ch’est pon chi mau ! Alors, j’sais d’jà qu’chertains is von’tent râler pach’que j’vais m’moquer d’eux. J’rappell’te qu’ch’est sins animosité et qu’in risque de n’pon tarder à taper dins l’aute cimp après ches conflits d’el s’maine. Pis, mi, au moins, j’vais essayer d’apporter eune solution. I fot bin treuver eune issue à cheule crisse du « ch’est mi qui dot ête l’chef ! » Alors, d’pis ch’matin, j’sus au téléphone aveuc ches producteurs d’el Star’Ac. In a déchidé d’faire eune émichion chpécial’te. In pus, te pinses bin qu’cha les intéresse, min idée. Cheule guéguerre alle fait pus d’Audimat que ches élèfes.
Mesdames et Messieurs, Nikos Imagasse i t’présinte Chef Academy, eune production Enbémol. L’seu production capape d’abaicher d’un d’mi-ton ches grintes gueules qui veul’tent avoir l’pouvoir et l’clé d’Sol…férino ! A l’issue d’el présintachion d’ches cindidats et leux interprétations, ch’est ti qui vas voter in invoyint un pou Ségolène, deusse pou Martine et tros pou Benoît. Excheptionnell’mint, te peux même invoyer quate chi te n’in as rin à faire ! Chinq, chi te veux adopter eune directriche hors d’âche pou ches fiêtes d’fin d’année. Chisse, chi te veux t’comminder eune pizza ! Mais d’abord in acceulle l’parrain d’cheule émission, qui étot ch’grind gagnint d’el saison précédinte : François l’aute pays du fromache ! I va interpréter sin dernier tube : « Ches bêtisses » : J’ai un trop-plein de cindidats. Pus qu’un congrès, un pugilat. Et com’ chi cha n’suffisot pon, ch’ro du byclou un peu ronchon. Fallot pon m’quitter, te vos, i est bieau che résultat. In fait rin que des bêtisses, des bêtisses, d’pis qu’y a Nicolas.
Bravo ! A’ch’t’heure, ch’est au tour de ch’premier cindidat. J’rappell’te à ches tévéchpectateurs que ch’tirache au sort de ch’passache i a été contrôlé par un huissier d’justiche, Me Ruban, qui prind toutes ches m’sures néchessaires pou l’bion déroul’mint. Ch’est Ségolène. Alle vient d’chez alle, in Poitou-charentes, d’ù qu’alle collectionn’te ches frigidaires. Alle est auchi eune militinte pou l’renouvieau du Françès. Grâche à ch’nouvieau miot de bravitute, alle aspir’te à finir immortelle. Après un rapite passache à ches cours d’théâte, alle donn’te sin premier chpectaque à ch’Zénith. Ch’soir, alle va interpréter sin tube techno, d’jà claché dins ches discothèques : « Fra-ter-ni-té ! » Bin, i n’y a pon gramint d’paroles dins un tube techno mais in l’incourache bin in l’vint ches bras.
In l’applaudit bin fort. A’ch’t’heure, in va arcevoir l’deussième cindidat. Alle s’appell’te Martine. Alle vient d’Lille au pays des ch’tis. Alle a eune hygiène d’vie et eune philosophie bin à alle : Quind t’as fait trinte-chinq heures à tin traval, te rintes à t’baraque pou t’occuper d’ti ! N’te fie pon à ch’talle, alle est tiote mais alle n’pach’te pon inaperçue ! Ch’est eune sacrée louloute, ch’est pou cha qu’dins ch’Nord in dit bi-loute ! (Nota : ch’n’est pon such’ prompteur que Nikos i lit, totale impro.) Ch’est l’rebelle de ch’promo. Te pinses bin qu’avoir disse-huit ins in 1968, cha laiche des traches. Alle va interpréter, ch’soir, sin tube : Dins ch’Nord, j’sus l’reine de ches ch’tis. Dins ch’Nord, m’sus pon ramollie. J’in veux cor’ pus à Paris. Pou ête l’chef de min parti.
Merchi Biloute ! A’ch’t’heure, ch’dernier cindidat : Benoît. In n’sait pon grind-cosse su li. Ch’est l’bieau gosse de ch’promo. I est toudis tiré à quate épingues. In sait, à’ch’t’heure, qu’i s’in sert auchi pou piquer ches fesses à Ségolène et à Martine quind ches caméras alles n’el film’tent pon ! Li, ch’est un inchien porte-parole et ch’soir, i la prêque : Mes biens quers frères, mes bins quères sœurs, arprenoz aveuc mi tous in chœur. Pon de Martine Aubry ni cor’ moins de Ségolène Royal. Ne votez pon pou Martine Aubry ni cor’ moins pou Ségolène Royal. A’ch’t’heure ch’parti i a b’soin d’eune nouvielle tiête, laichoz ches éléphints artourner à ch’cimetière. Pon de Martine Aubry ni cor’ moins de Ségolène Royal.

V’là, Mesdames, Messieurs, i n’te ress’ pus qu’à printe tin téléphone et composer ches numéros qu’in t’a donné in début de ch’t’émichion. Me Ruban i in a même rajouter un : ch’est ch’zéro ! Te peux même composer ch’numéro d’urginche valape d’ù qu’te sos in Europe, l’112. In t’inverra ch’bion serviche in fonction d’tin état après tout cha…