Chalut mes gins ! Bah, i y a un biout d’timps que j’n’aie pon fait un tiot coucou un diminche. Alors, in va in profiter ! Ch’est com’ d’habitute, in n’va pon ch’printe l’tiête. In n’in a assez d’el s’maine pou parler d’ches sujets qui fâch’tent sins cor’ armette cha un jour com’ à’ch’t’heure. Pis, cha quée bin, pach’que j’avos invie de t’parler d’un cop d’cœur que j’ai eu. Te sais qu’j’ai querre à l’musique et à ches canchons. Chi te m’lis régulièr’mint, je n’te l’apprinds pon. Quéquefos, quind t’intinds eune canchon, te l’as in tiête pindint du long. Même chi te fais aute cosse, cha timbourine à l’intérieur com’ chi ch’disque i pachot in boucle. Auchi, te peux sortir tin sonotone pach’qu’in va même l’son…

Com’ l’mason alle n’arcul’te d’vint rin, cha n’est pon un mais deusse canteurs qu’te vas avoir pou ch’même prix ! Parité obliche, chabadabada. Pardon, mes gins, j’voulos dir’te un homme et eune femme. Alors, com’ ch’est dins ches conv’ninches, in va commincher par Marie Guerraz, l’femme in question. Ches canchons alles sont festives. Cha donn’te invie d’bouger. Ches couleurs musicales alles ravisent d’euch côté d’el musique manouche et balkanique. Marie Guerraz alle est eune auteure et alle collabore aveuc ches grinds com’ Pascal Légitumus, David Laloue. Alle a un univers bin à alle. Ches textes racontent des histoires d’el vie d’tous ches jours in débanalisint ch’quotidien. Sin premier album i argroup’te onsse canchons et i s’appell’te « Le Monde d’Hortense ».
A’ch’t’heure, in va parler de ch’t’homme qu’alle a invité pou ch’duo. Et quel homme ! I est d’ichi, mes gins ! Ch’est min camarate Pat’Bol. D’ailleurs, t’as un clip d’li chous ch’rubrique d’mes méga potes d’pis long. Alors, ch’est vrai qu’te peux n’pon l’connaîte. Te n’sais pon ch’que t’as raté, mes gins ! Com’ in dit : I n’est jamais trop tard pou bin faire. Pou l’définir, j’pourros chertain’mint in faire des kilomètes mais j’vais juss’ arprinte ch’qu’i dit, li-même, d’li : «  Pat’Bol i fait partie d’ches éternels adoleschints qui prenn’tent l’vie pou eune imminche cour d’ récréachion. Dins un univers à ches tons pach’tels, quéque part intre Joe Dassin et Assurancetourix, ches canchons alles sont autint d’prétextes pou t’raconter ches déboires d’cœur d’artichaut. Des rythmes chaloupés et des airs à l’gomme qui prêtent à sourir’te, toudis frais, parfos naïfs, mais in aucun cas déprimints ! Com’ quo ches petits malheurs d’un seu peuv’tent faire l’bionheur d’tertous. » J’sus sûr’te qu’i va rajouter d’el canchon pouet-pouet mais pon gnian-gnian !
Ch’est tout li ! I n’euch prind pon à chérieux mais j’vais in profiter pou dir’te qu’chous l’perchonnache, i y a un homme d’eune gintillèche incroyape, drôl’te et extrêm’mint attintif à ches simblapes. Ch’est auchi un très grind musichien, même ch’i est trop modech’te pou in parler. Chi te li posses l’question, j’sus pratiqu’mint sûr’te qu’i va t’réponte : un mète quate-vingt-chisse ! In tout cas, chi te veux vraimint oublier tes chouchis ou qu’t’as un méga cop d’déprimes, te mets sin album : « Et peluches si affinités… » Avint l’fin du CD, j’te garintis qu’te cantes aveuc li et qu’t’as oublié tout ch’noir’te qui étot dins t’tiête ! D’ailleurs, in attind aveuc impachienche l’prochain qu’i est in train d’inr’gistrer…

A’ch’t’heure, quind te connos ch’t’univers d’ches deusse-lal, ch’duo i apparôt com’ eune évidinche. Cheule canchon alle ch’intitul’te « Les mains sur le ventre ». In pourrot résumer cha par ches ingoiches d’eune femme inceinte et de toute l’tinchion et ches interrogachions d’euch couple autour d’euch futur bébé. Trêve d’blabla, à’ch’t’heure, plache à l’musique ! In d’chous, t’artreuv’ras tous ches liens…